शिक्षालाई प्राथमिकता दिदै खैरहनी,बालवालिकाको लागि वस्तीमै गृहकार्य कक्षा सुरु
चितवन , ७ माघ । चितवनको खैरहनी नगरपालिकाले शिक्षालाई प्राथमिताको साथ अगाडी बढाएको छ । नगरपालिकाले विपन्न परिवारका बालवालिकाको शिक्षामा सुधार ल्याउन वस्ती वस्तीमै गृहकार्य कक्षा सुरु गरेको छ । विपन्न परिवारका बालवालिकाका अभिभावकको शैक्षिक योग्यता कम हुने र उनीहरु दैनिक ज्यालामजदुरी गरेर पेट पाल्नुपर्ने वाध्यतामा आफ्नो बालवालिकालाई अध्ययनको लागि सहयोग गर्न सकेका छैनन् । अध्ययनको लागि घरमा अभिभावकको सहयोग लिन नपाएका र विद्यालयको मात्रै भरमा रहेका विद्यार्थीहरुको सहजताको लागि वस्तीमै गृहकार्य कक्षा सुरु गरेको खैरहनी नगरपालिकाका नगर प्रमुख शशि कुमार खनियाँले जानकारी दिए ।
खैरहनी नगरपालिका वडा नम्बर ८ स्थित मगनी गाँउमा आज गृहकार्य कक्षा उद्घाटन कार्यक्रममा बोल्दै नगर प्रमुख खनियाँले नगरपालिका भित्र विभिन्न २८ स्थानमा गृहकार्य कक्षा सुरु गरिएको बताए । कक्षा १ देखी ५ सम्मका विद्यार्थीलाई लक्षित गरि सुरु गरिएको गृहकार्य कक्षाले विपन्न परिवारका विद्यार्थीको शैक्षिक गुणस्तरमा वृद्धि हुने अपेक्षा लिएको उनले बताए । गृहकार्य कक्षाको लागि लक्षित वस्ती नजिक विद्यालय भए विद्यालयमै र नभए कोठा भाडामा लिएर समेत नगरपालिकाले ठाँउको व्यवस्थापन गरेको , बस्ने कुर्ची वा म्याट र लेख्नको कापी कलम समेत उपलब्ध गराउने नगर प्रमुख खनियाँले बताए ।
गहृकार्य कक्षाको सहायताले विपन्न परिवारका बालवालिकामा विद्यालयपश्चात् पनि पढ्नेलेख्ने वानीको विकास हुने , अभिभावकको समय अभावमा समेत बालवालिकामाथी निगरानी र संरक्षण प्राप्त हुने खैरहनी नगरपालिकाकी उप प्रमुख कविता उप्रेतीले बताइन् । गृहकार्य कक्षा उद्घाटन कार्यक्रममा बोल्दै खैरहनी ८ का वडा अध्यक्ष शंकर कंडेलले विहानैदेखी काममा जानुपर्ने अभिभावक र निरक्षर अभिभावकका बालवालिकाहरुलाई गृहकार्य कक्षाले टेवा पुग्ने विश्वास व्यक्त गरे ।
गहृकार्य कक्षा कार्यक्रममा नगरपालिकाको १३ वटै वडाका करिब ७ सय ८४ जना विद्यार्थी लाभान्वीत हुने खैरहनी नगरपालिकाका शिक्षा अधिकृत रविन्द्र देवकोटाले बताए । वडाको सिफारिस अनुसार गृहकार्य कक्षाको लागि सहजकर्ता खटाइएको उनले बताए । सहजकर्ताहरुमा बहालवाल शिक्षक , स्वयम्सेवक शिक्षक र कक्षा १२ उतिर्ण गरेकाहरु रहेका छन् । नगरपालिकाले यसअघि सामुदायिक विद्यालयहरुमा विषयगत अध्ययन गराउन ५८ जना स्वयम्सेवक शिक्षकहरु खटाएर पठनपाठन गराउदै आएको छ । कार्यक्रममा विभिन्न वडाका वडा अध्यक्षहरु , खैरहनी ८ का वडा सदस्यहरु , विद्यालय व्यवस्थापन समितिका अध्यक्ष , टोल विकास संस्थाका अध्यक्ष, अभिभावक र विद्यार्थीहरुको सहभागिता रहेको थियो ।