भवन निर्माण व्यवसायी संघको साधारणसभा, स्थानिय सरकारले वेवास्ता गरेको गुनासो
चितवन, २३ मंसिर । भवन निर्माण व्यवसायी पूर्वीचितवनको २३ औं साधरणसभा शनिबार भएको छ । खैरहनीमा सम्पन्न साधारणसभामा स्थानिय सरकारले भवन निर्माण व्यवसायीहरुलाई वेवास्ता गरेको आवाज उठेको छ । पूर्वीचितवनका नगर प्रमुखहरुले भवन निर्माण व्यवसायीहरुलाई हेला गरेको उनीहरुले बताए । स्थानिय सरकारमात्रै नभएर प्रदेश र संघिय सरकारले समेत भवन निर्माण व्यवसायीहरुलाई खासै महत्व नदिएको उनीहरुको गुनासो थियो । आफूहरुको कार्यक्रममा पूर्वीचितवनका चारैवटा नगरपालिकाका नगर प्रमुखहरुलाई निमन्त्रणा गर्दा समेत कोहि पनि नगर प्रमुख कार्यक्रममा उपस्थित नभएपछि नगर प्रमुखहरुको नजरमा भवन निर्माण व्यवसायीहरुको कुनै मूल्य नरहेको आभाष भएको भवन निर्माण व्यवसायी संघका अध्यक्ष यम बहादुर श्रेष्ठले बताए ।
कार्यक्रममा बोल्ने सबै वक्ताहरुले कार्यक्रममा नगर प्रमुखहरु नआएको भन्दै आलोचना गरे । उनीहरुले निर्वाचनको बेला मात्रै आफूहरुलाई सम्झने तर अन्य बेला कसैले पनि वास्ता नगरेको बताए ।
कार्यक्रमका विशिष्ट अतिथी खैरहनी नगरपालिका वडा नम्बर ८ का वडा अध्यक्ष शंकर कंडेलले व्यवसायी र स्थानिय सरकार सरकार्य गर्दै अगाडी बढ्नुपर्नेमा जोड दिए । गुणस्तरीय र मापदण्ड अनुरुपका भवनहरु निर्माण गर्न निर्माण व्यवसायीहरुको भूमिका महत्वपूर्ण हुने वडा अध्यक्ष कंडेलले बताए । केहि व्यवसायीहरुले घरधनीहरुलाई नक्सापास गरेर मापदण्ड अनसार भवन बनाउदा धेरै खर्च लाग्ने भन्दै गलत सल्लाह दिने गरेको भन्दै गुणस्तरीय र भविष्यमा सुरक्षाको दृष्टिकोणले समेत मापदण्ड अनुसार नम्सापास गरेर मात्रै भवन निर्माण गर्न वडा अध्यक्ष कंडेलले आग्रह गरे ।
कार्यक्रममा भवन निर्माण व्यवसायी संघका निवर्तमान सचिव बालकृष्ण उप्रेती , पर्सा शाखा अध्यक्ष धन बहादुर तमाङ , चितवन निर्माण सेवा संघका अध्यक्ष प्रकाश दुलाल, स्वरोजगार निर्माण व्यवसायी संघका अध्यक्ष कृष्ण बहादुर पौडेल लगयातले बोलेका थिए । कार्यक्रममा संस्थाका अध्यक्ष यम बहादुर श्रेष्ठले प्रगती प्रतिवेदन , कोषाध्यक्ष निर प्रसाद भट्टले आर्थिक प्रतिवेदन प्रस्तुत गरेका थिए । कार्यक्रमको अवसरमा संस्थाले आफ्नो संस्थाको एक सदस्यको परिवारलाई राहत रकम समेत प्रदान गरेको थियो । संस्थाका सदस्य विफला महतोको मृत्यु भएकोले उनको श्रीमती लक्ष्मी थरुनीलाई ३ लाख रुपैयाँ राहत रकम प्रदान गरिएको संस्थाका सचिव कपिल घिमिरेले जानकारी दिए । त्यस्तै संस्थाले सदस्यहरुको परिवारबाट एकजना जेष्ठ नागरिक र कक्षा १२ मा उत्कृष्ट नतिजा ल्याउने एकजनालाई सम्मान समेत गरेको छ ।
संस्थाका सदस्य प्रेम बहादुर वि.कको आमा ८७ वर्षिय देवीमाया वि.क र कक्षा १२ मा उत्कृष्ट नतिजा ल्याउने कपिल घिमिरेको छोरी रोजिना घिमिरेलाई सम्मान गरिएको हो ।
