खैरहनी महोत्सव आजदेखि सुरु हुँदै, पर्यटन मन्त्री पाण्डेले उद्घाटन गर्ने

चितवन, ०५ पौष । उद्योग बाणिज्य संघ खैरहनिको आयोजनामा शुक्रबार आहदेखि तेस्रो खैरहनी महोत्सव सुरु हुदैछ । संस्कृति ,पर्यटन तथा नागरिक उड्डयन मन्त्री बद्री पाण्डेको प्रमुख आतिथ्यतामा महोत्सवको उद्घाटन हुनेछ । महोत्सव सुरु हुनु अघि खैरहनी नगरपालिका गेट अगाडिबाट विभिन्न जातजाति ,संघसंस्थाको पहिचान झल्कने झांकी सहितको शोभा यात्रा निकालिनेछ । परिसरमा कृषि प्रदशनी स्थलबाहेक २ सय बढी स्टल निर्माण गरिएको छ । स्टेज आकर्षक बनाईएको छ ।

महोत्सवमा विभिन्न पेशा, व्यापार, उद्योग, व्यक्ति, युवा, वृद्ध तथा विद्यार्थीवर्ग गरी करिव २ लाख अवलोकनकर्ताले अवलोकन गर्ने अनु‌मान गरिएको छ । करिव एक करोड बाह्र लाखको लगानीमा सञ्चालन हुन लागेको महोत्सवमा सवारी साधनहरुसहित गरी करिव १५ करोड वरावरको कारोवार हुने अपेक्षा गरिएको संघका अध्यक्ष एवं महोत्सवका संयोजक कुमार खनालले बताए ।

तेस्रो खैरहनी महोत्सवको अवसरमा यस पटक पर्सा बजारमा पुस १३ गते देखि १५ गतेसम्म फूड फेस्टिबलको आयोजना गर्न लागिएको छ । फेस्टिवलमा स्थानीय जातजातिका खानाका परिकार ,कुखुराबाट बन्ने परिकारहरुलाई प्राथमिकता दिइएको उनले बताए । व्यवसायिक साझेदारी प्रयास स्वरुप महोत्सवको प्रवेश टिकटको आधारमा म्याड्‌ङ्गो जनन्योति सिनेमा हल र मौलाकालिका केबलकारको टिकटमा ५०% छुटको व्यवस्था गरिएको छ ।

संघका वरिष्ठ उपाध्यक्ष एव कला,सांस्कृतिक समिती संयोजक अर्जुन लम्सालले यस पटक सांस्कृतिक कार्यक्रमलाई भब्य बनाउन प्रख्यात कलाकार,गायक,गायिकालाई ल्याउन लागिएको बताए ।

महोत्सवको पुर्व सन्ध्यामा बिहीबार आयोजित रोड रेश प्रतियोगितामा नागेश्वर अहिर प्रथम भएका छन् । नेपाल पुलिस क्लबका अहिरले निर्धारित ७ किलोमिटरको दुरि २२ मिनेट ४० सेकेन्डमा पूरा गर्दै प्रथम भएका हुन् । उनले १० हजार रुपैयाँ पुरस्कार प्राप्त गर्नेछन् । द्वितीय भएका शशस्त्र प्रहरिका राजेन्द्र तामाङले २२ मिनेट ५० सेकेन्ड ,तृतीय भएका कालिका नगरपालिकाका सुनिल बिकले २४ मिनेट ३६ सेकेन्डमा निर्धारित दुरि पूरा गरे ।

द्वितीय र तृतीयले क्रमश ७ हजार र ५ हजार रुपैयाँ पुरस्कार प्राप्त गर्नेछन् । बिजयी खेलाडिहरुलाई महोत्सवको कुनै अवसर पारेर पुरस्कृत गरिने महोत्सवका खेलकुद समिति संयोजक प्रेम जोशीले जानकारी दिए । चौथो देखि दशौ सम्मका खेलाडीलाई एक एक हजार रुपैयाँ पुरस्कार दिइनेछ ।