खैरहनी नगरपालिका वडा नम्बर ८ मा अभिभावक शिक्षा कार्यक्रम संचालन

चितवन, २४ पौष । खैरहनी नगरपालिका वडा नम्बर ८ मा अभिभावक शिक्षा कार्यक्रम संचालन भएको छ । शिक्षामा सुधार ल्याउन त्रिकोणीय समन्वय आवश्यक रहने भन्दै शिक्षक र विद्यार्थीले मात्रै शिक्षामा सुधार ल्याउन कठिन रहेको महशुुस गरेर अभिभावकलाई समेत जिम्मेवार बनाउन अभिभावक शिक्षा कार्यक्रम आयोजना गरिएको खैरहनी नगरपालिका वडा नम्बर ८ का वडा अध्यक्ष शंकर कंडेलले जानकारी दिए । अभिभावकहरुलाई आफ्नो दायित्व , कर्तव्य , बच्चाहरुसँग गरिने व्यवहार ,बोल्ने शब्द , घरको वातावरणको लगायतको विषयमा सचेत गराउन कार्यक्रम आयोजना गरिएको वडा अध्यक्ष कंडेलले बताए ।

कार्यक्रम उद्घाटनको क्रममा प्रमुख अतिथि खैरहनी नगरपालिकाका नगर प्रमुख शशि कुमार खनियाले नगरपालिकाले शैक्षिक गुुणस्तरमा बृद्धि गर्न विभिन्न कार्यक्रम तथा निति कार्यान्वयनमा ल्याएको बताए । शिक्षक मिलान , गृहकार्य कक्ष , सिक्स टु सिक्स , कक्षा ११ र १२ मा खैरहनी माध्यमिक विद्यालयमा निशुुल्क विज्ञान संकाय संचालन गरेको , भुुवानीशंकरमा छात्राहरुलाई र गरिब तथा जेहेन्दार विद्यार्थीहरुलाई छात्रवृत्तिको व्यवस्था , विद्यालयहरुले प्रदान गर्ने १० प्रतिशत छात्रवृत्तिलाई प्रत्येक्ष अनुुगमन लगायतको विभिन्न सुधारको काम गरेको बताए । त्यस्तै नगरले आफ्नै स्थानीय पाठ्यपुस्तक समेत तयार गरेको नगर प्रमुख खनियाले बताए ।

कार्यक्रममा सहजिकरण गरेको संस्था साभ नेपालका अध्यक्ष डा. तुलसी राम खनालले बालबालिकालाई कसरी हुर्काउने र पढाउने दोश्रो सत्रमा किशोर अवस्थाका बालबालिकाको मनोविज्ञान , तेस्रो सत्रमा परिवार, समाज र देशको उच्च समुन्नत विकास, असल अभिभावकले सिक्नुपर्ने र जान्नु पर्ने आधारभुत तथा व्यवहारिक कुराहरुको विषयमा प्रशिक्षण दिएका थिए । त्यस्तै साभ नेपालका सदस्य तथा दिब्याश्रम हिलिङ्ग एन्ड रिसर्च सेन्टरका फाउन्डर हिलर पास्टलाइफ रिग्रेसन थेरापिस्ट मुक्त खवासले तनाव व्यवस्थापनको प्रयोगात्मक अभ्यास र रिल्याक्सेसन, साथै मास हिलिङ्ग गराएको खैरहनी ८ का वडा सदस्य श्याम कुमार पाठकले जानकारी थिए । कार्यक्रममा करिब ३ सयजना अभिभावकको सहभागिता रहेको थियो ।