एड्वानको आयोजनामा खैरहनीमा रुपान्तरणकारी सामाजिक परिचालन तालिम

चितवन, २७ चैत । नेपाल दलित महिला उत्थान संघ( एड्वान)द्वारा खैरहनीमा रुपान्तरणकारी सामाजिक परिचालन तालिमको प्रदान गरिएको छ । सामाजिक ,आर्थिक रुपान्तरणका लागि खैरहनी नगरपालिका वडा नम्बर ७ र ९ का ३० जना महिलाहरूलाई नेतृत्व बिकास तालिम दिइएको छ । ५ दिनसम्म संचालन भएको तालिमको आज समापन गरिएको हो । तालिम समापन कार्यक्रममा बोल्दै एड्वानका प्रबन्धक कमल बाबू परियारले नेतृत्व विकास तालिममा सहभागीहरुलाई ५ दिनको सीप विकास तालिम र त्यसपछि व्यवसायिक तालिम दिइने बताए । नेतृत्व बिकास संगै आयआर्जनमा जोड्दै सामाजिक रुपान्तरण गर्ने उदेश्य रहेको प्रबन्धक परियारले बताए ।

समापन कार्यक्रममा बोल्दै खैरहनीमा नगर प्रमुख शशी कुमार खनियांले नेतृत्व बिकास गराउंदै आयआर्जनमा जोड्ने कार्यक्रम रहेकाले यसमा नगरपालिकाले सहकार्य गर्ने बताए । तालिम दिने,लिने चलन मात्र रहेको आफुले पाएको भन्दै उनले सीप बिकास तालिम पछि बीउ पुंजी दिएर ब्यबसायनै संचालन गर्न सक्ने बनाएको बताए ।
उपप्रमुख कविता उप्रेतीले महिलाहरु सामाजिक रुपान्तरणको लागि अब नेतृत्व गर्ने र निर्णय लिने स्थानमा पुग्नुपर्नेमा जोड दिइन् ।

खैरहनी ७ का वडा अध्यक्ष मनेजर महतोले नगर र वडाले विभिन्न कार्यक्रम मार्फत महिला सशक्तीकरण र महिलालाई आयअर्जनमा जोड्ने तालिमहरु दिएको बताए । तालिममा सहभागीहरुलाई १५/१५ जनाको दुई वटा समूह बनाएर तालिम प्रदान गरिएको एड्वानकी सामाजिक सहजकर्ता सुनिता दराईले जानकारी दिइन् ।