खैरहनी ३ का महिलाहरुलाई एड्वानद्वारा तरकारी खेती सम्बन्धि तालिम
चितवन , ३० पुस । नेपाल दलित उत्थान महिला संघ (एड्वान)ले खैरहनी ३ का महिलाहरुलाई तरकारी खेती सम्बन्धि तालिम दिएको छ । खैरहनी नगरपालिका वडा नम्बर ३ स्थित बुद्धशान्ती टोलका १५ जना महिलाहरुलाई मौसमी तथा बेमौसमी तरकारी खेती सम्बन्धि तालिम दिइएको हो ।
खैरहनी नगरपालिकासंगको समन्वयमा एड्वानले महिलाको लागि सुधारिएको जिविकोपार्जन तथा आर्थिक अवसर परियोजना अन्तर्गत एक हप्ताको तरकारी खेती सम्बन्धि तालिम दिएको एड्वानकी सहजकर्ता सुनिता दराइले जानकारी दिइन् । एक हप्तासम्म संचालित तालिमको आज समापन गरिएको छ । तालिममा सहभागी भएकाहरुलाई समुहमा संगठित गर्दै व्यवसायिक तरकारी खेती गर्न बीउ पुजि समेत प्रदान गरिएको छ । तालिम लिएको समुहलाई नगद१२ हजार ५ सय रुपैया बीउ पुजि प्रदान गरिएको एड्वानकी कार्यबाहक अध्यक्ष पम्फा परियारले बताइन् । तालिममा सहभागीहरुलाई खैरहनी नगरपालिकाका नगर प्रमुख शशी कुमार खनियाले प्रमाणपत्र प्रदान गरेका थिए ।
सो अवसरमा बोल्दै नगर प्रमुख खनियाले तालिम लिएर मात्रै केहि नहुने भन्दै त्यसलाई व्यवहारमा लागू गर्नुपर्नेमा जोड दिए । तालिम लिने तर खेतवारीमा तरकारी खेती नगर्ने हो भने तालिम लिनुको औचित्य नहुने भन्दै नगर प्रमुखले तालिममा सिकेको विषयलाई व्यवहार लागू गर्दै तरकारी उत्पादनले लाग्न आग्रह गरे । कृषिको लागि आवश्यक प्राविधिक तथा आर्थिक सहयोग गर्न नगरपालिका सदैव तयार रहेको भन्दै काम गर्न इच्छुकहरुले कुनै प्रकारको तालिम आवश्यक रहे माग गर्न सुझाव दिए । कार्यक्रममा खैरहनी नगरपालिका उप प्रमुख कविता उप्रेती , खैरहनी नगरपालिका वडा नम्बर ३ का कार्यबाहक वडा अध्यक्ष माधव श्रेष्ठ , कृषि शाखा प्रमुख सिर्जना श्रेष्ठ लगायतले मन्तव्य राखेका थिए ।
