खैरहनीमा बजार अनुगमन, दुईवटा पसललाई २५-२५ हजार जरिवाना

चितवन , १ चैत । पुर्वीचितवनको खैरहनी नगरपालिका वडा नम्बर ८ स्थित पर्सा बजारमा आज अनुगमन गरिएको छ । खैरहनी नगरपालिका , उद्योग तथा वाणिज्य कार्यालय चितवन, जिल्ला प्रशासन कार्यालय चितवन , खाद्य तथा गुण नियन्त्रण डिभिजन कार्यालयको संयुक्त टोलिले आज खैरहनीका विभिन्न पसलमा अनुगमन गरेको थियो । अनुगमनको क्रममा पर्सा बजारको दुईवटा मासु पसललाई कारबाही गरिएको छ । न्युनतम मापदण्ड अनुसार सरसफाई नगरेको , उपभोक्ताको स्वास्थ्यमाथी खेलवाड गरेको पाइएपछि र यसअघिको अनुगमनमा समेत पटक पटक सचेत गराउदा समेत सुधार नगरेको भन्दै दुईवटा पसललाई कारबाही गरिएको हो । खैरहनी ८ स्थित चितवन मिट सप्लायर्स र न्यु सुलभ मिट सप्लायर्सलाई २५/२५ हजार रुपैयाँ जरिवाना गरिएको छ ।

सम्बन्धित व्यवसायले आवश्यक मापदण्ड पालना नगरेको तथा सरसफाइ र व्यवस्थापनमा लापरवाही देखिएको भन्दै कारबाही गरिएको अनुगमन टोलीले जनाएको छ। खैरहनी नगरपालिका उप प्रमुख कविता उप्रेती नेतृत्वको टोलिले करिव एक दर्जन पसलहरुको अनुगमन गरेको थियो । अनुगमनको क्रममा अन्य पसलहरुलाई समेत सरसफाइमा ध्यान दिन , म्याद गुज्रिएको सामाग्री विक्रीवितरण नगर्न , मुल्यसुची राखी सोही अनुसार विक्रीवितरण गर्न सुझाव दिइएको उद्योग तथा वाणिज्य कार्यालय भरतपुरका प्रमुख विनोद पौडेलले जानकारी दिए । विश्व उपभोक्ता अधिकार दिवसको अवसरमा अनुगमनसंगै अन्तरक्रिया कार्यक्रम समेत गरिएको थियो । उद्योग तथा वाणिज्य कार्यालयको आयोजना भएको अन्तरक्रिया कार्यक्रममा बोल्दै चितवनका सहायक प्रमुख जिल्ला अधिकारी चुडामणी गौतमले जिल्ला प्रशासन कार्यालयले समेत नियमित रुपमा बजार अनुगमन गरिरहेको बताए । नियमितसंगै कतैबाट गुनासो आउदा समेत कडाईको साथ अनुगमन गरिएको भन्दै पछिल्लो समय देखापर्न लागेको ग्यास अभावलाई समेत सहजीकरण गरिरहेको बताए । उनले चितवनमा अहिले ग्यासको खासै समस्या नभएको भन्दै कसैले ग्यास नपाएर समस्या भए जिल्ला प्रशासन कार्यालयमा गुनासो गर्न सकिने बताए । जिल्ला प्रशासन कार्यालयले ग्यास नपाएर कुनै समस्या भए हटलाईन नम्बर ९८५५०८८८९२ मा सम्पर्क गर्न आग्रह गरे ।

खैरहनी नगरपालिकाकी उपप्रमुख कविता उप्रेतीले उपभोक्ताको स्वास्थ्य र सुरक्षासँग खेलबाड गर्ने कार्य कुनै पनि हालतमा सह्य नहुने स्पष्ट पारिन् । नगरपालिकाले बजार व्यवस्थापन र उपभोक्ता संरक्षणका लागि नियमित अनुगमन गर्दै जाने उनले बताइन्।कार्यक्रममा बोल्दै उद्योग तथा वाणिज्य कार्यालय चितवनका प्रमुख विनोद पौडेलले आफुहरुले सबै सरोकारवाला पक्षहरुको समन्वयमा बजार अनुगमनलाई निरन्तरता दिदै आएको बताए । उनले व्यवसायीलाई कानुनी मापदण्ड पालना गर्दै सुरक्षित र गुणस्तरीय वस्तु तथा सेवा उपलब्ध गराउन आग्रह गरे ।

कार्यक्रममा खाद्य तथा गुण नियन्त्रण कार्यालय चितवनका प्रमुख प्रमोदचन्द्र पौडेल, उद्योग वाणिज्य संघ खैरहनीका अध्यक्ष कुमार खनाल, उद्योग संघ खैरहनी इकाइकी अध्यक्ष प्रतिभा श्रेष्ठ, उपभोक्ता अधिकार संरक्षण मञ्च चितवनका उपाध्यक्ष विष्णुप्रसाद भुसाल, उद्योग वाणिज्य संघ खैरहनीका उपाध्यक्ष रामेश्वर पोखरेल लगायतले हरेक व्यवसायी आफैमा उपभोक्ता समेत भएकाले उपभोक्ताको स्वास्थ्यलाई विशेष ध्यान दिएर व्यवसाय संचालन गर्नुपर्नेमा जोड दिए ।