वित्त आयोगको मूल्यांकनमा खैरहनी चितवनकै उत्कृष्ट
चितवन , १५ वैशाख । खैरहनी नगरपालिका कार्यसम्पादन मूल्यांकनमा चितवनकै उत्कृष्टमा परेको छ । राष्ट्रिय प्राकृतिक स्रोत तथा वित्त आयोगले गरेको मूल्यांकनमा ७८.०९ अंक ल्याउदै खैरहनी नगरपालिका: चितवनकै उत्कृष्टमा परेको हो । यसअघिको मूल्यांकनमा खैरहनी नगरपालिकाको अंकमा त्रुटी भएको भन्दै आयोगले खैरहनीको अंक सच्याएको आयोगका प्रवक्ता सुकदेव प्रसाद बास्कोटाले जानकारी दिए । सार्वजनिक भएको मूल्यांकन नतिजा पछि हेदैै जाँदा खैरहनीको अंकमा त्रुटि देखेपछि त्यसलाई सच्याउन पर्ने दायित्व भयो र त्यहीँ अनुसार अहिले अंक सच्याएका छौं, प्रवक्ता बास्कोटाले भने ।
खैरहनीको सुरुको मूल्यांकनमा ६५.१० अंक आएकोमा अहिले ७८.०९ अंक कायम भएको हो । त्यस्तै रत्ननगर नगरपालिकाले सुरुमा ६३.२३ अंक ल्याएको थियो । पछि आयोगले दिएको पुनरावलोकनको समयमा कागजपत्र थप गरेपछि रत्ननगरले ७६.२२ अंक ल्याएको थियो । राप्ती नगरपालिकाले ३६.२० , कालिका नगरपालिकाले ६४.५२ , इच्छाकामना गाँउपालिकाले ७४.३३ ,भरतपुर महानगरपालिकाले ६८.०४ र माडी नगरपालिकाले ६७.१३ अंक ल्याएको छ । आयोगले विभिन्न १७ वटा सूचकलाई आधार मानेर स्थानिय तहको कार्यसम्पादन मूल्यांकन गर्दै आएको छ ।
स्थानीय सरकारको कार्यसम्पादन गर्न प्रयोग गरिएका सूचकहरु :
सूचक १ गाउँ कार्यपालिका/नगर कार्यपालिकाले २०८२ असार १० गतेभित्र आर्थिक वर्ष २०८२/८३ को राजस्व र व्ययको अनुमान सम्बन्धित गाउँ/नगरसभामा पेश गरेको/नगरेको।
सूचक २ गाउँ कार्यपालिका/नगर कार्यपालिकाले आर्थिक वर्ष २०८२/८३ को राजस्व र व्ययको अनुमान सम्बन्धित गाउँ सभाबाट २०८२ असार मसान्तभित्र पारित गरेको/नगरेको।
सूचक ३ स्थानीय तहले आर्थिक वर्ष २०८१/८२ मा घर जग्गा रजिस्ट्रेशन शुल्क, मनोरञ्जन कर तथा विज्ञापन कर बापत उठेको रकममध्ये प्रदेश सरकारलाई दिनुपर्ने ४० प्रतिशत रकम मासिक रूपमा प्रदेश सञ्चित कोषमा जम्मा गरेको/नगरेको।
सूचक ४ स्थानीय तहले आ.व. २०८२/८३ को आय व्यय प्रक्षेपण गरिएको तथ्यांक सहितको विवरण २०८२ पुष मसान्तभित्र अर्थ मन्त्रालयमा पेश गरेको/नगरेको।
सूचक ५ स्थानीय तहले आर्थिक वर्ष २०८१/८२ को बजेट कार्यान्वयनको वार्षिक समीक्षा गरी तत्सम्बन्धी विवरण २०८२ कार्तिक मसान्तभित्र सार्वजनिक गरेको/नगरेको।
सूचक ६ स्थानीय तहले आफ्नो अधिकार क्षेत्रभित्र राजस्व परिचालन गरेको अवस्था।
सूचक ७ स्थानीय तहको गत आर्थिक वर्षको विनियोजित रकम अनुसार खर्चको अवस्था।
सूचक ८ आर्थिक वर्ष २०८०/८१ को कुल बेरुजुबाट औल्याएको बेरुजुको अवस्था।
सूचक ९ स्थानीय सञ्चित कोष व्यवस्थापन प्रणाली (SUTRA) को प्रयोग गरेको/नगरेको।
सूचक १० स्थानीय तहले आवधिक योजना तर्जुमा गरेको/नगरेको।
सूचक ११ शैक्षिक सत्र २०८२ मा कक्षा १ देखि ८ सम्म ५ देखि १२ वर्ष उमेर समूहका विद्यार्थीको खुद भर्ना दर।
सूचक १२ शैक्षिक सत्र २०८१ मा कक्षा ८ को तुलनामा कक्षा ९ मा विद्यार्थी टिकाउ दर।
सूचक १३ शैक्षिक सत्र २०८१ मा सामुदायिक विद्यालयबाट कक्षा १० को परीक्षामा सहभागी कुल विद्यार्थी संख्याको तुलनामा कम्तिमा स्तरीकृत अंक (GPA 1.6) वा सो भन्दा उच्च GPA प्राप्त गरेका विद्यार्थीको प्रतिशत।
सूचक १४ आर्थिक वर्ष २०८१/८२ मा चार पटक गर्भ जाँच गर्ने गर्भवती महिलाको अनुपात।
सूचक १५ आर्थिक वर्ष २०८१/८२ संस्थागत स्वास्थ्य संस्थामा सुत्केरी हुने महिलाको अनुपात।
सूचक १६ आर्थिक वर्ष २०८१/८२ मा पूर्ण खोप पाएका बालबालिकाको अनुपात।
सूचक १७ आयोगले तयार गरेको विद्युतीय अनलाइन पोर्टलमा कार्य सम्पन्नता सूचक सम्बन्धी विवरण तोकिएको अवधिमा प्रविष्टि गरेको/नगरेको।
