अटिजम भएका बालबालिकाको सिकाइ सहज बनाउन ताज मन्टेश्वरीका शिक्षिकाहरुलाई विशेष तालिम

चितवन , २१ जेठ । अटिजम तथा अन्य बौद्धिक विकासमा ढिलाइ भएका बालबालिकाहरूको पहिचान, स्याहार र उनीहरूको सिकाइ प्रक्रियालाई थप प्रभावकारी बनाउने उद्देश्यका साथ शिक्षकहरूका विशेष तालिम दिइएको छ ।

ताज मन्टेश्वरी एन्ड चाइल्ड केयरको आयोजनामा सञ्चालित ३ दिने उक्त तालिम विशेष गरी बालबालिकाहरूमा देखिने व्यवहारिक समस्याहरूलाई बुझ्न र उनीहरूको आवश्यकता अनुसारको शिक्षण सिकाइ र सामाजिकीकरण प्रक्रियालाई सहज बनाउन केन्द्रित रहेको थियो। तालिमको मुख्य प्रशिक्षकका रूपमा पेडियाट्रिक प्रशिक्षक कल्पना बस्नेत र अकुप?न्चरिस्ट थेरापिस्ट कमला कुमारी उप्रेती रहनुभएको थियो। उहाँहरूले सहभागी शिक्षकहरूलाई मन्टेश्वरी विधि र अटिजम दुवै क्षेत्रलाई समेटेर समावेशी शिक्षाका आधुनिक आयामहरूबारे व्यावहारिक ज्ञान प्रदान गर्नुभएको थियो।
​तालिम अवधिभर प्रशिक्षकद्वयले बालबालिकाहरूमा सञ्चार कौशल (बोली, हाउभाउ र शैली) को विकास कसरी गर्ने, उनीहरूको व्यवहारिक व्यवस्थापन कसरी गर्ने र फिजियोथेरापी एवं अकुपेसनल थेरापीका माध्यमबाट उनीहरूको शारीरिक तथा मानसिक क्षमता कसरी सुदृढ गर्ने भन्ने विषयमा विस्तृत प्रशिक्षण दिनुभएको थियो। यसका साथै, प्रत्येक बालबालिकाको विशिष्ट आवश्यकतालाई ध्यानमा राखेर तयार पारिने व्यक्तिगत शैक्षिक योजना ( Individualized Education Program – IEP) निर्माण र यसको कार्यान्वयन सम्बन्धी अभ्यास समेत गराइएको थियो।

तालिममा २२ जना शिक्षिकाहरूको सक्रिय सहभागिता रहेको ताज मन्टेश्वरी तथा चाइल्ड केयरको संचालक अनिता पाण्डेले जानकारी दिनुभयो ।तालिम समापनका अवसरमा बोल्दै प्रशिक्षकहरूले अपाङ्गता र अटिजम भएका बालबालिकाहरूलाई समाजको मूल प्रवाहमा ल्याउन र उनीहरूको अन्तर्निहित क्षमता उजागर गर्न शिक्षकहरूको भूमिका महत्वपूर्ण हुने भन्दै तालिममा सिकेका सीपलाई कक्षाकोठा र व्यवहारमा उतार्न आग्रह गर्नुभयो। सहभागी शिक्षिकाहरूले पनि यस किसिमको तालिमले विशेष आवश्यकता भएका बालबालिकाहरूलाई हेर्ने दृष्टिकोण र पढाउने शैलीमा ठूलो परिवर्तन ल्याउने बताए ।