सुदूरपश्चिममा विपद् व्यवस्थापनका दुई कार्ययोजना स्वीकृत, मनसुन तयारी प्रभावकारी बनाइने

चितवन, २७ आषाढ । सुदूरपश्चिम प्रदेश विपद् व्यवस्थापन परिषद्ले विपद् व्यवस्थापनलाई थप प्रभावकारी बनाउन दुई महत्वपूर्ण कार्ययोजना अनुमोदन गरेको छ।

मुख्यमन्त्री तथा परिषद्का अध्यक्ष कमलबहादुर शाहको अध्यक्षतामा धनगढीमा बसेको बैठकले ‘मनसुन पूर्वतयारी तथा प्रतिकार्य प्रादेशिक कार्ययोजना (पाँचौँ संशोधन, २०८३)’ र ‘बहुप्रकोप पूर्वसूचना रणनीतिक कार्ययोजना (२०२५–२०३०)’ स्वीकृत गरेको हो।

यी कार्ययोजना लागू भएसँगै मनसुनजन्य विपद्को पूर्वतयारी, अन्तरनिकाय समन्वय, स्रोत–साधन व्यवस्थापन, पूर्वसूचना प्रणाली, खोज तथा उद्धार, राहत वितरण र पुनःस्थापनाका काम थप प्रभावकारी हुने अपेक्षा गरिएको छ।

बैठकमा मुख्यमन्त्री शाहले विपद् प्रतिकार्यमा कुनै कमजोरी नहुने गरी तयारी अवस्थामा रहन सम्बन्धित निकायलाई निर्देशन दिँदै तीनै तहका सरकार, सुरक्षा निकाय र विकास साझेदारबीच समन्वय गरेर सीमित स्रोत–साधनको अधिकतम उपयोग गर्नुपर्नेमा जोड दिए।

बैठकमा सहभागी मन्त्री, प्रदेशसभा सदस्य, सुरक्षा निकायका प्रमुख तथा विकास साझेदारहरूले जलवायु परिवर्तनका कारण बढ्दो विपद् जोखिमलाई ध्यानमा राख्दै पूर्वतयारी, प्रभावकारी पूर्वसूचना प्रणाली र समन्वयात्मक प्रतिकार्यलाई प्राथमिकता दिनुपर्ने धारणा राखेका थिए।