पूर्वीचितवनको विभिन्न होटल तथा मिष्ठान्न भण्डारमा अनुगमन

चितवन , २ कार्तिक । पूर्वीचितवनको विभिन्न होटल तथा मिष्ठान्न भण्डारमा आज अनुगमन भएको छ । जिल्ला प्रशासन कार्यालय चितवन , खाद्य प्रविधि तथा गुण नियन्त्रण डिभिजन कार्यालय भरतपुर , उद्योग तथा वाणिज्य कार्यालय , उपभोक्ता हित संरक्षण सहितको टोलीले आज रत्नननगर र खैरहनीका केहि होटल तथा मिष्ठान्न भण्डारको अनुगमन गरेको हो । अनुगमनको क्रममा केहि मिष्ठान्न भण्डारमा सरसफाईमा सुधार गर्नुपर्ने देखिएको र केहिमा एक पटक हालेको तेल धेरै प्रयोग हुदाँ गुणस्तर खस्किएको भेटिएको छ । अनुगमनको क्रममा मालिका हस्पिटालिटी एण्ड फूड प्रालि (बैष्णव) को टाँडी र पर्सा दुवै शाखामा तेल पटक पटक प्रयोग हुदाँ तेलको गुणस्तर खस्किएको देखिएकोले तेल नष्ट गर्न लगाइएको र एक पटक हालेको तेललाई धेरै पटक प्रयोग नगर्न सुझाव दिएको खाद्य प्रविधि तथा गुण नियन्त्रण डिभिजन कार्यालय भरतपुरका प्रमुख प्रमोद चन्द्र पौडेलले जानकारी दिए । त्यस्तै रत्ननगरको हाम्रो होटलमा समेत तेल धेरैपटक प्रयोग हुँदा गुणस्तरमा ह्रास आएको देखिएकोले तेल नष्ट गर्नुको साथै सरसफाईमा ध्यान दिन अनुगमन टोलीले निर्देशन दिएको छ । खैरहनीको गणेश मिष्ठान्न भण्डारलाई समेत तेल धेरै पटक प्रयोग नगर्न भन्दै तेल नष्ट गर्न निर्देशन दिएको पौडेलले बताए ।
खैरहनीको राजवंशी मिष्ठान्न भण्डारको भान्छा र मिठाई बनाउने स्थानको उचित व्यवस्थापन र सरसफाईमा विशेष ध्यान दिन भनिएको छ । उक्त मिष्ठान्न भण्डारको भान्छा र मिठाई बनाउने कारखाना अव्यवस्थित र फोहोर देखिएकोले १५ दिनभित्र सुधार गर्न निर्देशन दिइएको जिल्ला प्रशासन कार्यालय चितवनका प्रशासकीय अधिकृत मदन लामा थिङले बताए ।

खैरहनीकै ऊँ गणेश मिष्ठान्न भण्डारलाई समेत सरसफाईमा ध्यान दिन र कर्मचारीको पोशाक र खाद्य स्वच्छता कायम गर्न मापदण्ड अनुरुपको कपडा र कपाल छोप्न टोपी लगाउन अनुगमन टोलीले सुझाव दिएको छ । त्यस्तै लड्डुमा रङको मात्रै धेरै देखिएकोले त्यसलाई तत्काल घटाउन र मापदण्ड भन्दा धेरै प्रयोग नगर्न समेत निर्देशन दिएको छ ।
अनुगमनमा जिल्ला प्रशासन कार्यालय चितवनका प्रशासकीय अधिकृत मदन लामा थिङ , खाद्य प्रविधि तथा गुण नियन्त्रण डिभिजन कार्यालय भरतपुरका प्रमुख प्रमोद चन्द्र पौडेल, उद्योग तथा वाणिज्य कार्यालयका गौतम मैनाली , उपभोक्ता हित संरक्षण समितिका उपाध्यक्ष विष्णु भुषाल लगायतको टोली रहेको थियो ।