इरानद्वारा होर्मुज जलडमरु बन्दको घोषणा, अमेरिका–इरान तनाव थप चर्किने संकेत

चितवन, ०५ बैशाख । इस्लामिक रिभोलुसनरी गार्ड कोर्प्स (आइआरजिसी) ले होर्मुज जलडमरु पुनः बन्द गरिएको घोषणा गरेको छ।

इरानका अनुसार आफूहरूले यसअघि जलडमरु खुला गरे पनि संयुक्त राज्य अमेरिका ले इरानी बन्दरगाहहरूमा नाकाबन्दी जारी राखेकाले पुनः बन्द गर्न बाध्य भएको हो। आइआरजिसीको संयुक्त सैन्य कमाण्डले अमेरिकामाथि “नाकाबन्दीको नाममा समुद्री डकैती र चोरीजस्ता गतिविधि” जारी राखेको आरोप लगाएको छ।

जारी वक्तव्यमा जलडमरुमाथि पुनः कडा नियन्त्रण कायम गरिएको र अहिले यो रणनीतिक मार्ग इरानी सशस्त्र बलको निगरानीमा रहेको उल्लेख गरिएको छ। साथै, अमेरिकाले इरान आउने–जाने जहाजहरूको पूर्ण आवागमन स्वतन्त्रता सुनिश्चित नगरेसम्म कडाइ जारी रहने चेतावनी पनि दिइएको छ।

यस घटनासँगै इरान र संयुक्त राज्य अमेरिका बीचको सम्बन्ध थप तनावपूर्ण बन्ने देखिएको छ। प्रस्तावित वार्तासमेत अन्योलमा पर्ने सम्भावना बढेको छ भने दुई देशबीच सैन्य टकरावको जोखिम पनि बढ्दै गएको संकेत देखिएको छ।