फ्रान्समा १५ वर्षमुनिका बालबालिकालाई सामाजिक सञ्जाल प्रतिबन्ध लगाउने कानुन खारेज

चितवन, ३१ साउन ।  फ्रान्सको संवैधानिक परिषद्ले १५ वर्षमुनिका बालबालिकालाई सामाजिक सञ्जाल प्रयोगमा प्रतिबन्ध लगाउने कानुन खारेज गरेको छ।

परिषद्ले उक्त प्रतिबन्धले बालबालिकाको अभिव्यक्ति तथा सञ्चार स्वतन्त्रतामा अनुचित, आवश्यकताभन्दा बढी र असमानुपातिक हस्तक्षेप गर्ने ठहर गरेको हो।

फ्रान्सेली सांसदहरूले जुलाईमा पारित गरेको यो कानुन लागू भएको भए फ्रान्स १५ वर्षमुनिका बालबालिकालाई सामाजिक सञ्जाल प्रयोगबाट रोक्ने पहिलो युरोपेली देश बन्ने थियो। बालबालिकाको मानसिक स्वास्थ्यमा सामाजिक सञ्जालको सम्भावित नकारात्मक प्रभावलाई ध्यानमा राख्दै कानुन ल्याइएको थियो।

राष्ट्रपति इमानुएल म्याक्रोंले सेप्टेम्बरदेखि चरणबद्ध रूपमा प्रतिबन्ध लागू गर्ने प्रतिबद्धता जनाएका थिए। तर परिषद्को शुक्रबारको निर्णयसँगै उक्त योजना रोकिएको छ।

परिषद्ले सामाजिक सञ्जाल तथा अन्य अनलाइन सेवामा पहुँचका लागि उमेर प्रमाणित गर्नुपर्ने व्यवस्थामा समेत आवश्यक कानुनी सुरक्षा पर्याप्त नभएको भन्दै चिन्ता व्यक्त गरेको छ।

निर्णयपछि राष्ट्रपति म्याक्रोंले प्रधानमन्त्री सेबास्टियन लेकोर्नुलाई परिषद्का आपत्तिहरू सम्बोधन गर्दै नयाँ विधेयक तयार गर्न निर्देशन दिएका छन्।