वित्तीय अपराधमा संलग्न समूहबाट प्रधानमन्त्री र ममाथि नियोजित आक्रमण भइरहेको छ : अर्थमन्त्री स्वर्णिम वाग्ले

चितवन, २७ जेठ । अर्थमन्त्री डा. स्वर्णिम वाग्लेले नेपाली इतिहासकै ठूलो वित्तीय अपराधमा संलग्न समूहले प्रधानमन्त्री र आफूविरुद्ध नियोजित रूपमा आक्रमण गरिरहेको आरोप लगाउनुभएको छ।

बुधबार प्रतिनिधिसभाको अर्थ समितिमा बजेटसम्बन्धी छलफलका क्रममा बोल्दै उहाँले सरकारले उक्त वित्तीय अपराधमा संलग्न व्यक्तिहरूमाथि छानबिन गरिरहेको र केही दिनभित्रै मुद्दा अदालत पुग्ने जानकारी दिनुभयो।

उहाँले यस विषयमा विभिन्न समूहबाट फैलाइएका भ्रमपूर्ण प्रचारप्रति सचेत रहन सांसदहरूलाई आग्रह गर्दै सार्वभौम संसद्को गरिमा जोगाउन सबै जिम्मेवार हुनुपर्ने बताउनुभयो।

“प्रधानमन्त्रीज्यू र ममाथि नियोजित रूपमा घेराबन्दी र आक्रमण भइरहेको छ,” अर्थमन्त्री वाग्लेले भन्नुभयो, “नेपाली इतिहासकै ठूलो वित्तीय अपराधमा संलग्न व्यक्तिहरूमाथि सरकारले अनुसन्धान गरिरहेको छ। केही दिनमै यो विषय अदालतमा प्रवेश गर्नेछ। त्यसैले ती समूहसँग निकट रहेका व्यक्तिहरूबाट प्रधानमन्त्री र मविरुद्ध आक्रमण भइरहेको हुनसक्ने आशंका गरेको छु।”