राष्ट्रियसभामा सांसदहरूको सुझाव: बजेट कार्यान्वयनका लागि स्रोत स्पष्ट र प्रभावकारी बनाउन माग

चितवन, ०१ असार ।  राष्ट्रियसभाको आजको बैठकमा सांसदहरूले आगामी आर्थिक वर्ष २०८३/८४ को बजेट कार्यान्वयन प्रभावकारी बनाउन स्पष्ट स्रोत सुनिश्चित गर्न सरकारलाई सुझाव दिएका छन्। बजेटको राजस्व र व्यय अनुमानमाथिको छलफलमा सहभागी सांसदहरूले बजेटको कार्यान्वयन क्षमता, आर्थिक वृद्धिको आधार, कृषि क्षेत्रको प्राथमिकता तथा सामाजिक न्यायका विषयमा सरकारको ध्यानाकर्षण गराए।

सांसद कृष्णबहादुर रोकायले बजेट रूपान्तरणकारी हुने अपेक्षा गरिए पनि यसको कार्यान्वयन पक्ष चुनौतीपूर्ण देखिएको बताए। उनले नयाँ तथा आकर्षक कार्यक्रम भए पनि गहिरो विश्लेषण गर्दा उत्साहजनक अवस्था नरहेको टिप्पणी गरे।

त्यसैगरी, सांसद उर्मिला अर्यालले सरकारले आगामी वर्ष सात प्रतिशत आर्थिक वृद्धिको लक्ष्य राखे पनि कुन–कुन क्षेत्रबाट योगदान आउँछ भन्ने स्पष्ट नभएको बताइन्। उनले रोजगारी सिर्जना र बेरोजगारी समाधानमा बजेटको दृष्टिकोण प्रष्ट नभएको उल्लेख गरिन्।

सांसद प्रेमप्रसाद दङ्गालले कर दर हेरफेरबारे संसदीय छानबिन गरी दोषीमाथि कारबाही गर्नुपर्ने माग गरे। उनले बजेट कुन आर्थिक मोडेलमा आधारित हो भन्ने स्पष्ट हुनुपर्ने आवश्यकता औंल्याए।

यस्तै, सांसद पूजा चौधरीले स्रोतको ठोस आधारबिना बजेट निर्माण भएकाले कार्यान्वयनमा समस्या आउन सक्ने बताइन्। उनले स्वास्थ्य सेवामा कर लगाइए उपचार खर्च महँगो हुन सक्ने चेतावनी समेत दिइन्।