प्रचण्ड–नेपाल पक्षलाई नेकपाका २८८ केन्द्रीय सदस्यले बुझाए नागरिकता र परिचयपत्र
काठमाडौं,७ फागुन ।
पार्टीको आधिकारिकता प्रमाणिकरणका लागि भन्दै नेकपाको दाहाल–नेपाल समूहले केन्द्रीय सदस्यहरुको नागरिकता तथा परिचय पत्र संकलन गरेको छ।
आज (शुक्रबार) पार्टी केन्द्रीय कार्यालय पेरिसडाँडामा बसेको आकस्मिक बैठकमा आफ्नो पक्षका केन्द्रीय सदस्यहरुको नागरिकता संकलनको काम भएको हो।
पार्टीको आधिकारिकता विवादबारे निर्णय दिन निर्वाचन आयोगले ढिलाइ गरेपछि भौतिक उपस्थितिसहित पार्टीको आधिकारिकता दाबी गर्न आज कागजाताहरु संकलन गरिएको केन्द्रीय सदस्य रामकुमारी झाँक्रीले जानकारी दिइन्।
दाहाल–नेपाल समूहले आफूहरुसँग बहुमत रहेको पार्टीको आधिकारिकता आफूहरुले पाउनुपर्ने दाबी निर्वाचन आयोगमा यसअघि नै पेस गरिसकेको छ।
‘निर्वाचन आयोगमा हामी केन्द्रीय समिति बैठकको माइन्युट पेस गरेका थियौँ, त्यो हस्ताक्षर प्रमाणीकरणका लागि आयोगमा जानुपर्छ, यदि आयोगले बोलायो भने जानुपर्छ भनेर हामीले आज नागरिकता तथा परिचय पत्र संकलन गरेका हौँ।’ झाँक्रीले भनिन्।
आधिकारिकता विवादमा आयोग ओलीको दबाबमा परेको ठहरसहित दाहाल नेपाल समूहले आफ्नो पक्षमा ५१ प्रतिशतभन्दा बढी सदस्य रहेको दाबी भौतिक रुपमै गर्ने तयारी गरेको हो।
