चुनावको तयारी थाल्न देउवाको आह्वान

काठमाडौँ,७ फागुन  ।

नेपाली कांग्रेसका सभापति शेरबहादुर देउवाले चुनाव जसरी पनि हुने बताएका छन् । नुवाकोट कांग्रेसले आयोजना गरेको कार्यक्रममा देउवाले प्रतिनिधि सभा पुनःस्थापना भए पनि चुनाव हुने भएकोले तयारी अवस्थामा रहन कार्यकर्तालाई निर्देशन दिएका हुन् । ‘चुनाव हुन्छ-हुन्छ । ओलीले चुनाव नगरेर सुख पाउँछन् ?’ देउवाले भने, ‘प्रचण्ड–ओलीलाई चुनाव लागिसक्यो। चुनाव चिन्ह मागिरहेका छन् । हाम्रा साथीहरु चुनाव हुँदैन भनिरहेका छन् । चुनाव भयो भने के गर्ने ? चुनावबाट भाग्न त मिल्दैन ।’

देउवाले कांग्रेसका नेताहरु प्रधानमन्त्री केपी शर्मा ओलीकोविरुद्ध बोल्न सक्ने भएको भन्दै धन्यावाद पनि दिए । उनले पुष्पकमल दाहालकोविरुद्ध पनि बोल्न नेता कार्यकर्तालाई आग्रह गरे । ‘डर हटाउनुस् कांग्रेसलाई कसैले हराउन सक्दैन’ उनले भने । उनले केही गरी प्रतिनिधि सभा विघटनकै पक्षमा सर्वाेच्च अदालतबाट फैसला भए ६ महिनाभित्र निर्वाचन हुने पनि बताए । कामचलाउ प्रधानमन्त्री ओलीले चुनाव गराउन नसके सबै मिलेर हटाउने पनि देउवाको भनाइ छ ।