अवैध लागुऔषधसहित दुई जना पक्राउ

चितवन, ८ फागुन ।
जिल्ला प्रहरी कार्यालय चितवनले अवैध लागुऔषधसहित दुई जनालाई पक्राउ गरेको छ । प्रहरीले चितवनका विभिन्न स्थानबाट पक्राउ गरेको दुई जनालाई आज सार्वजनिक गरेको हो ।
गत फागुन ५ गते भरतपुर महानगरपालिका–१७ गाजीपुरबाट स्थानीय २७ वर्षीय धिरज लामालाई २ ग्राम ८७० मिलीग्राम अवैध लागुऔषध खैरो हिरोइसहित पक्राउ गरिएको प्रहरीले जनाएको छ । जिल्ला प्रहरी कार्यालय चितवनका प्रवक्ता प्रहरी नायब उपरीक्षक सूर्य बहादुर थापाले पक्राउ परेका लामालाई फागुन ५ गते नै चितवन जिल्ला अदालतबाट सात दिनको म्याद थपगरी अनुसन्धान अगाडि बढाएको जानकारी दिए ।
त्यस्तै, फागुन ६ गते दिउँसो चितवन प्रहरीले भरतपुर–१० बाट खैरो हिरोइनसहित अर्का व्यक्तिसमेत पक्राउ गरेको छ । प्रहरी प्रवक्ता थापाकाअनुसार प्रहरीले भरतपुर–१० ज्ञानदर्शन चोकबाट भरतपुर–१७ का ३० वर्षीय गोविन्द राउतलाई १ ग्राम ५७ मिलीग्राम अवैध खैरो हिरोइन सहित पक्राउ गरिएको हो । राउतलाई चितवन जिल्ला अदालतबाट फागुन ६ गते सात नै सात दिनका लागि म्याद थपगरी अनुसन्धान अगाडि बढाइएको थापाले जानकारी दिए ।