कठारमा स्वास्थ्य चौकी भवनको शिलन्यास
चितवन । पूर्वी चितवनको खैरहनी नगरपालिका वडा नं १० कठारमा स्वास्थ्य चौकी भवनको एक कार्यक्रमका बीच शिलान्यास गरिएको छ । खैरहनी नगरपालिकाका प्रमुख शशी कुमार खनिया र उप प्रमुख कविता उप्रेतीले स्वाथ्य चौकी भवनको शिलान्यास गरेका हुन् ।
आधारभूत स्वास्थ्य सेवाको पहुँचलाई थप प्रभावकारी बनाउन खैरहनी नगरपालिका वडा नं १० को वडा कार्यालयसंगैको जग्गामा स्वास्थ्य चौकी भवन निर्माण हुन लागेको नगरपालिका प्रमुख शशी कुमार खनियाले जानकारी दिए । शिलन्यास कार्यक्रममा बोल्दै नगर प्रमुख शशी कुमार खनियाले नगरपालिकाले भौतिक पूर्वाधार निर्माणसंगै स्वाथ्य, शिक्षा र पोषणका कार्यक्रमहरु सघन रुपमा सञ्चालन गरिरहेको उल्लेख गरे ।
कठार स्वास्थ्य चौकीको भवन भविस्यमा अस्पतालको सेवा दिन सक्ने गरी निर्माण गर्न लागेको नगर प्रमुख खनियाको दाबी थियो । स्वास्थ्य चौकी भवन नगरपालिकाले यसै आर्थिक वर्षमा बजेट विनियोजन गरी निर्माण कार्यको थालनी भएको र यही आर्थिक वर्षको अन्त्य सम्म पूर्ण रूपमा निर्माण सम्पन्न हुने नगर उपप्रमुख कविता उप्रेतीले जानकारी गराइन ।
स्थानीय बासिन्दा, स्वास्थ्यकर्मीहरु, जनप्रतिनिधिहरु र कर्मचारीको उपस्थितिमा सम्पन्न कार्यक्रममा वडा नं १० का वडाअध्यक्ष चन्द्र बिक्रम चौधरीले स्वाथ्य चौकीको अत्याधुनिक भवन निर्माण सम्पन भए पछि खैरहनी नगरपालिकाको वडा नं ९,१० र ११ का नगरबासीले गुणस्तरीय स्वास्थ्य सेवा प्राप्त गर्ने उल्लेख गरे।
सो भवन एक करोड २८ लाख ७० हजारमा निर्माण सम्पन्न हुने गरी सम्झौता भएको र १३६८ वर्ग फिट जमीन भवनले ओगटने खैरहनी नगरपालिकाका इन्जिनियर समुन्द्र कडेलले जानकारी दिएका छन् ।
