खैरहनी नगरस्तरीय तेक्वान्दो प्रतियोगितामा खैरहनी दोजाङ प्रथम

चितवन , १९ जेठ । खैरहनीमा भएको तेस्रो नगरस्तरिय तेक्वान्दो प्रतियोगितामा खैरहनी तेक्वान्दो दोजाङ प्रथम भएको छ । शुक्रबार र शनिबार भएको प्रतियोगितामा १३ स्वर्ण , ५ रजत र १ कास्य पदक प्राप्त गर्दै खैरहनी तेक्वान्दो दोजाङ प्रथम भएको हो । त्यस्तै सैनिक महाविद्यालय द्वितीय भएको छ । ५ स्वर्ण ३ रजत र ४ कास्य पदक प्राप्त गर्दै सैनिक महाविद्यालय दोस्रो भएको हो । प्रतियोगितामा ५ स्वर्ण २ रजत र ४ कास्य पदकसहित तेस्रो भएको छ । प्रतियोगितामा प्रथम, द्वितीय र तृतीय हुने समुहलाई ट्रफि सहित खेलाडीहरुलाई मेडल र प्रमाणपत्र प्रदान गरिएको नगर तेक्वान्दो संघ खैरहनीका अध्यक्ष तथा प्रतियोगिताको संयोजक सुमन थापाले जानकारी दिए ।

प्रतियोगितामा पुरुषतर्फको उत्कृष्ट फाइटरको उपाधी गौतम बुद्ध तेक्वान्दो दोजाङका रोजिन अधिकारी र महिलातर्फ खैरहनी तेक्वान्दो दोजाङकी बन्दना पुडासैनीले प्राप्त गरे । प्रतियोगितामा प्रथम , द्वितीय र तृतीय भएका समूह र खेलाडीहरुलाई खैरहनी नगरपालिका उप प्रमुख कविता उप्रेती ,नगर खेलकुद विकास समिति खैरहनीका अध्यक्ष धनविर चौधरी , चितवन तेक्वान्दो संघका निवर्तमान अध्यक्ष पुष्पराज जोशीले ट्रफी ,मेडल र प्रमाणपत्र वितरण गरेका थिए । प्रतियोगितामा खैरहनीभित्रका सातवटा समूहका १ सय ३७ जनाको सहभागीता रहेको थियो । खैरहनी नगरपालिकाले आयोजना गरेको प्रतियोगिताको नगर तेक्वान्दो संघले संयोजन गरेको थियो ।