पर्सा खानेपानीको नेतृत्व चयनको लागि भोलि मतदान हुने , दुई प्यानल मैदानमा

चितवन, ०९ फाल्गुन । पर्सा खानेपानी तथा सरसफाई उपभोक्ता संस्थाको संचालक समिति चयनको लागि भोलि मतदान हुदैछ । संचालक समितीको लागि दुई प्यानल निर्वाचनमा होमिएका छन् । मुख्य ठुला दलहरुको समर्थनमा गणेश वर्तौला नेतृत्वको समूह रहेको छ भने अर्कोतर्फ प्रकाश रुपाखेती नेतृत्वको प्यानल रहेको छ । वर्तौला नेतृत्वको संस्थापन समुहलाई नेपाली काङ्ग्रेस , नेकपा एमाले , नेकपा माओवादी केन्द्र र राप्रपा लगायतको दलको समर्थन रहेको छ ।

त्यस्तै रुपाखेती नेतृत्वको प्रगतिशील स्वतन्त्र समुहलाई राष्ट्रिय  स्वतन्त्र पार्टी ,नेकपा एकीकृत समाजवादी पार्टी  लगायतको समर्थन रहेको छ ।

संचालक समिति चयनको लागि शनिबार बिहान ८ देखि अपरान्ह ४ बजेसम्म मतदान हुने मुख्य निर्वाचन अधिकृत शेष शंकर उप्रेतीले जानकारी दिए । अध्यक्ष , उपाध्यक्ष , सचिव र सदस्य पदको लागि मतदान हुदैछ । कोषाध्यक्षमा पुर्ण कुमारी श्रेष्ठ , लेखा संयोजकमा कोपिला दुवाडी , सदस्यहरुमा जिवनाथ सिल्वाल र शिला उप्रेती अधिकारी यसअघिनै निर्विरोध निर्वाचित भएका छन् ।

मतदानमा सहभागी हुने टाढाको वडाबाट आउने जेष्ठ नागरिक र अशक्तहरुको लागि यातायातको व्यवस्था समेत गरिएको संस्थाको कार्यबाहक अध्यक्ष श्याम कुमार पाठकले बताए ।