चैतको तेस्रो सातादेखि सातै पालिकामा ‘पीपीआर’ खोप अभियान, २.५ लाख बाख्रालाई खोप लगाइने
चितवन, ०९ चैत्र । जिल्लाका सातै पालिकामा यही चैतको तेस्रो सातादेखि ‘पीपीआर’ विरुद्धको खोप अभियान सञ्चालन गरिने भएको छ। अभियानअन्तर्गत करिब दुई लाख ५० हजार बाख्रालाई खोप लगाउने लक्ष्य तय गरिएको छ। हाल जिल्लामा करिब तीन लाख बाख्रा पालिएको जनाइएको छ।
पशुसेवा कार्यालय चितवनका प्रमुख डा. प्रभात न्यौपानेका अनुसार ‘पीपीआर’ रोग मोरडिली भाइरसका कारण लाग्ने गर्दछ। उनका अनुसार यो रोग लागेपछि ५० देखि ९० प्रतिशतसम्म बाख्रा मर्न सक्छन्। संक्रमित बाख्रामा उच्च ज्वरो आउने, मुखमा घाउ हुने, झाडापखाला लाग्ने, नाक र आँखाबाट सिँगान बग्ने, निमोनिया जस्तो लक्षण देखिने, सास फेर्न गाह्रो हुने, खान मन नलाग्ने तथा छिट्टै कमजोर भएर मर्ने जस्ता लक्षण देखिन्छन्।
उनका अनुसार रोगको लक्षण संक्रमण भएको तीनदेखि पाँच दिनभित्र देखिन थाल्छ र सातदेखि १० दिनभित्र बाख्रा मर्न सक्ने जोखिम हुन्छ। कार्यालयले हरेक वर्ष यस रोगविरुद्ध खोप अभियान सञ्चालन गर्दै आएको छ।
यो रोग संक्रमित बाख्राको जुत्ता, नाकबाट निस्कने सिँगान, आँखाको आँसु, खोक्दा वा हाच्छ्युँ गर्दा निस्कने सूक्ष्म कणमार्फत फैलिन्छ। साथै दूषित पानी, दाना र सोत्तरबाट पनि संक्रमण फैलिन सक्छ।
डा. न्यौपानेले व्यवसायिक बाख्रापालन गर्ने किसानलाई जैविक सुरक्षा उपाय अपनाउन सुझाव दिएका छन्। उनले रोगको संक्रमण फैलिन नदिन संक्रमित बाख्रालाई तुरुन्तै बथानबाट अलग राख्नुपर्ने बताएका छन्।
