खैरहनीमा सुरक्षित वैदेशिक रोजगारी सम्बन्धी अभिमुखीकरण कार्यक्रम

चितवन, ०८ बैशाख । खैरहनीमा समुदायस्तरमा सुरक्षित वैदेशिक रोजगार सम्बन्धी अभिमुखीकरण तथा सूचना प्रवाह कार्यक्रम भएको छ। खैरहनी नगरपालिका वडा नम्बर १ को सभाहलमा भएको कार्यक्रममा वैदेशिक रोजगारीका क्रममा कामदारहरूले भोग्नुपर्ने सम्भावित जोखिम, ठगी तथा गैरकानुनी प्रक्रियाबाट जोगिन अपनाउनुपर्ने सावधानी, आधिकारिक निकायमार्फत सही सूचना प्राप्त गर्ने उपाय र प्रचलित सरकारी प्रक्रियाबारे विस्तृत छलफल गरिएको थियो। साथै सुरक्षित र मर्यादित वैदेशिक रोजगारीका लागि आवश्यक कागजात, श्रम सम्झौता, बीमा तथा अनिवार्य अभिमुखीकरण तालिमको महत्त्वबारे सहभागीलाई जानकारी गराइएको थियो।

वक्ताहरूले वैदेशिक रोजगारीलाई सुरक्षित, व्यवस्थित र मर्यादित बनाउँदै समुदायस्तरमै सचेतना अभिवृद्धि गर्न यस्ता कार्यक्रम प्रभावकारी हुने धारणा व्यक्त गरे । नगरप्रमुख शशी कुमार खनियाले वैदेशिक रोजगारीमा जाने युवाहरूलाई सही सूचना र कानुनी प्रक्रियामार्फत मात्र अगाडि बढ्न आग्रह गर्दै स्थानीय तहले आवश्यक सहजीकरण तथा परामर्श सेवा उपलब्ध गराउने प्रतिबद्धता जनाए। कार्यक्रममा वडा नं. १ का वडाध्यक्ष नवराज भुषाल , वडा सदस्यहरू , नगरपालिकाका प्रतिनिधि तथा वैदेशिक रोजगारीमा रहेका परिवारका सदस्यहरूको उल्लेखनीय उपस्थिति रहेको थियो।

समुदायस्तरमा सचेतना विस्तार गर्दै वैदेशिक रोजगारीलाई सुरक्षित र व्यवस्थित बनाउने उद्देश्यले कार्यक्रम आयोजना गरिएको जनाइएको छ ।