रास्वपाले महाधिवेशन तयारी तीव्र बनायो, रवि लामिछानेको नेतृत्वमा मूल आयोजक समिति गठन

चितवन, १८ जेठ । राष्ट्रिय स्वतन्त्र पार्टी (रास्वपा) ले आगामी असार ७ देखि ९ गतेसम्म चितवनमा आयोजना हुने पहिलो महाधिवेशनको तयारीलाई तीव्रता दिएको छ।

महाधिवेशनलाई व्यवस्थित र भव्य रूपमा सम्पन्न गर्न पार्टी सभापति रवि लामिछानेको नेतृत्वमा ‘महाधिवेशन मूल आयोजक समिति’ गठन गरिएको रास्वपाले जनाएको छ। पार्टीका प्रवक्ता कविन्द्र बुर्लाकोटीका अनुसार समितिले महाधिवेशनका सम्पूर्ण व्यवस्थापन र समन्वयको जिम्मेवारी वहन गर्नेछ।

समितिमा उपसभापति डा. स्वर्णिम वाग्ले, महामन्त्रीद्वय कविन्द्र बुर्लाकोटी र भूपदेव शाह, सहमहामन्त्री विपिनकुमार आचार्य, कोषाध्यक्ष लिमा अधिकारी, सहकोषाध्यक्ष बसुमाया तामाङ, प्रवक्ता मनिष झा तथा सचिवालय सदस्यहरू विराजभक्त श्रेष्ठ र दीपकराज बोहरा सदस्य रहेका छन्।

त्यसैगरी, गणेश पराजुली, सोविता गौतम, शिशिर खनाल, हरि ढकाल, सरिता ज्ञवली र सागर ढकाललाई पनि समितिमा समेटिएको छ। पार्टीका सबै केन्द्रीय सदस्य तथा सातै प्रदेशका प्रदेश सभापतिलाई समेत मूल आयोजक समितिमा समावेश गरी समितिलाई पूर्णता दिइने महामन्त्री बुर्लाकोटीले जानकारी दिए।