सीमा विवाद कूटनीतिक वार्ताबाटै समाधान हुन्छ : परराष्ट्रमन्त्री खनाल
प्रकाशित मिति: बिहिबार, जेठ २८, २०८३ | १५:५४:५७
चितवन, २८ जेठ । परराष्ट्रमन्त्री शिशिर खनालले प्रधानमन्त्री बालेन्द्र शाहले प्रतिनिधिसभामा व्यक्त गरेको नेपाल–भारत सीमा सम्बन्धी धारणा ‘क्रस बोर्डर अकुपेसन’ अर्थात् सीमावर्ती क्षेत्रमा देखिएको पारस्परिक भूमि उपयोगको अवस्थासँग सम्बन्धित रहेको स्पष्ट पारेका छन्।
राष्ट्रियसभाको बिहीबारको बैठकमा बोल्दै मन्त्री खनालले नेपाल र भारतबीचको घनिष्ठ सम्बन्ध, ऐतिहासिक सन्धि–सम्झौता तथा आधिकारिक नक्साका आधारमा सीमा सम्बन्धी विषय कूटनीतिक संवादमार्फत समाधान गर्न सरकार प्रतिबद्ध रहेको बताए।
उनले खुला सीमाका कारण दशगजा आसपासका केही क्षेत्रमा लामो समयदेखि ‘क्रस होल्डिङ’ को अवस्था रहेको उल्लेख गर्दै स्थानीयवासीले आपसी समझदारीमा सीमा वारपार खेतीपाती गर्दै आएको बताए। प्रधानमन्त्री शाहको अभिव्यक्ति यही यथार्थतर्फ केन्द्रित रहेको उनको भनाइ थियो।
मन्त्री खनालका अनुसार प्रधानमन्त्री शाहले सीमा निर्धारणको विषय सन् १८१६ को सुगौली सन्धिसँग सम्बन्धित रहेको उल्लेख गरेका थिए। साथै, संयुक्त अधिराज्य (बेलायत) को सन्दर्भ उठाउनुको उद्देश्य कुनै तेस्रो पक्षको मध्यस्थता खोज्नु नभई ऐतिहासिक अभिलेख तथा सन्दर्भ सामग्री सीमा समस्या समाधानमा सहयोगी हुन सक्ने आशय मात्र रहेको स्पष्ट पारे।
प्रकाशित मिति : बिहिबार, जेठ २८, २०८३ |
१५:५४:५७
199
