डा. देवेन्द्रराज पाण्डेको योगदान इतिहासमा सधैं स्मरणीय रहनेछ : संयोजक प्रचण्ड
चितवन, ०२ साउन । पूर्वप्रधानमन्त्री तथा नेपाली कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’ले नागरिक अगुवा तथा पूर्वमन्त्री डा. देवेन्द्रराज पाण्डेको निधनप्रति गहिरो दुःख व्यक्त गरेका छन्।
शोक सन्देश जारी गर्दै प्रचण्डले नेपालमा शान्ति प्रक्रिया, लोकतान्त्रिक गणतन्त्रको स्थापना, नागरिक स्वतन्त्रता, सुशासन र जनअधिकारको पक्षमा डा. पाण्डेले पुर्याएको योगदान नेपाली इतिहासमा सदैव सम्मानपूर्वक स्मरणीय रहने बताएका छन्।
उनले शोकसन्तप्त परिवार, आफन्त तथा डा. पाण्डेप्रति सम्मान र स्नेह राख्ने सम्पूर्णमा हार्दिक समवेदना व्यक्त गरेका छन्।
नागरिक अगुवा तथा पूर्वमन्त्री डा. देवेन्द्रराज पाण्डेको शुक्रबार साँझ काठमाडौँको विशालनगरस्थित निवासमा ८७ वर्षको उमेरमा निधन भएको हो। स्वास्थ्यमा समस्या देखिएपछि उनलाई पाटन अस्पताल लगिएको थियो भने उपचारपछि शुक्रबार नै निवास फर्काइएको थियो।
