अन्नपूर्ण संरक्षण क्षेत्रमा पाँच लाखभन्दा बढी विदेशी पर्यटक, नयाँ कीर्तिमान कायम
चितवन, ०२ साउन । अन्नपूर्ण संरक्षण क्षेत्रमा विदेशी पर्यटकको आगमनले नयाँ कीर्तिमान कायम गरेको छ।
अन्नपूर्ण संरक्षण क्षेत्र आयोजनाका अनुसार आर्थिक वर्ष २०८२/८३ मा पाँच लाख आठ हजार ४७६ विदेशी पर्यटकले यस क्षेत्रको भ्रमण गरेका छन्, जुन अघिल्लो आर्थिक वर्षको तुलनामा झण्डै दोब्बर हो।
आयोजना प्रमुख डा. रवीन कडारियाका अनुसार आर्थिक वर्ष २०८१/८२ मा दुई लाख ७८ हजार ११३ विदेशी पर्यटकले अन्नपूर्ण क्षेत्रको भ्रमण गरेका थिए।
गत वर्ष सबैभन्दा धेरै तीन लाख ७५ हजार ७९७ भारतीय पर्यटक पुगेका थिए भने चीनका १२ हजार ५३९ र अमेरिकाका नौ हजार ८८४ पर्यटक क्रमशः दोस्रो र तेस्रो स्थानमा रहेका छन्।
गत वर्ष १६९ देशका पर्यटक अन्नपूर्ण क्षेत्रमा पुगेका थिए। भारतसहित दक्षिण एसियाली मुलुकबाट तीन लाख ८४ हजार १४५ र अन्य देशबाट एक लाख २४ हजार ३३१ पर्यटक आएका आयोजनाले जनाएको छ।
