राष्ट्रियसभामा सुस्ता सीमा विवादको विषय उठ्यो, सरकारको ध्यानाकर्षण
चितवन, १८ साउन । राष्ट्रियसभामा पश्चिम नवलपरासीको सुस्ता क्षेत्रमा देखिएको सीमा विवाद तथा भारतीय सीमा सुरक्षा बल (एसएसबी) को हस्तक्षेपको विषय उठाइएको छ।
सोमबारको राष्ट्रियसभा बैठकमा सांसद पूजा चौधरीले सुस्ता गाउँपालिका–५ स्थित थारु टोलमा नेपाली भूमिमा निर्माणाधीन १३२ मिटर लामो अस्थायी बाँध भारतीय एसएसबीले भत्काउन थालेपछि स्थानीय र एसएसबीबीच विवाद उत्पन्न भएको जानकारी गराइन्।
उनले सुस्ता नेपालको सार्वभौमिकता, राष्ट्रियता र सीमासँग जोडिएको संवेदनशील विषय भएकाले भावनात्मक प्रतिक्रियाभन्दा कूटनीतिक पहलमार्फत समाधान खोज्न सरकारसँग आग्रह गरिन्।
सांसद चौधरीले सीमा क्षेत्रमा बसोबास गर्ने नेपाली नागरिकको सुरक्षा सुनिश्चित गर्न तथा उनीहरूको दैनिक जनजीवन सहज बनाउन आवश्यक कदम चाल्न सरकारको ध्यानाकर्षण गराउँदै सुस्तालगायत सीमासम्बन्धी विवादको दीर्घकालीन समाधान उच्चस्तरीय कूटनीतिक संवादबाट खोज्नुपर्नेमा जोड दिइन्।
