माइतीघर मण्डलमा निषेधाज्ञा, दुर्गा प्रसाईंको कार्यक्रम स्थल भोलि टुंग्गिने

काठमाडौं । काठमाडौं जिल्ला प्रशासन कार्यालयले केन्द्रीय सुरक्षा समिति , गृह मन्त्रालय लगायतसागको परामर्शका आधारमा माइतीघर मण्डलमा प्रर्दशन गर्न रोक लगाउने निर्णय गरेको छ । नेकपा एमालेका जनवर्गीय संगठन युवा विद्यार्थी र मेडिकल ब्यवसायी दुर्गा प्रसाईंका परस्पर विरोधी सभा मंसिर ७ का लागि तोकिएको र माइतीघर मण्डलामै कार्यक्रम गर्न दुबै पक्षले खोजेपछि स्थानीय प्रशासनले उक्त स्थानमा कार्यक्रम गर्न निषेधाज्ञा जारी गरेको हो । यधपी यो निषेधाज्ञाको औपचारिक जानकारी जिल्ला प्रशासन कार्यालय काठमाडौंले गरिसकेको छैन ।  तर प्रर्दशन गर्न लागिएका दुवै प्षलाई यस बारेमा जानकारी काठमाडौं जिल्ला प्रशासन कार्यालयले गराईसकेको छ ।

दुवै पक्षलाई उक्त स्थानमा कार्यक्रम गर्न नदिने गरी जानकारी गराईसकिएको जिल्ला प्रशासन कार्यालय, काठमाडौँका सहायक प्रमुख जिल्ला अधिकारी रविन्द्रप्रसाद आचार्यले जानकारी दिए । ‘माइतीघर मण्डला नजिकै अदालतहरू छन । अस्पतालहरू छन्। बिरामी बोकेका एम्बुलेन्स ओहोरदोहोर गरिरहने स्थान हो। यसलाई प्रभावित हुनेगरी त्यो क्षेत्रमा कसैलाई पनि कार्यक्रम गर्न दिँदैनौँ। उहाँहरु दुबै पक्षलाई यो विषयमा जानकारी गराईदिईसकिएको छ । उहाँहरु कार्यक्रम स्थालका बारेमा जानकारी लिन सम्पर्कमा आउनुभयो भने छुट्टाछुट्टै स्थान तोकिदिन्छौं’, आचार्यले भने, ‘यदि छलफलमा नआई कानुनविपरीतका काम भए र त्यही प्रर्दशन गर्न खोजे कानुन अनुसार कारबाही हुन्छ ।’

पछिल्लो समय प्रसाईं र एमालेका बीचमा अस्वस्थ्थ विवाद चर्किरहेको छ । एमालेको राष्ट्रिय युवा संघले सरकार र अराजकतावादीविरुद्ध युवा विद्यार्थीको शक्ति प्रदर्शन गर्न लागिएको बताएको छ । प्रसाईंले राष्ट्र, राष्ट्रियता, धर्म, संस्कृति र नागरिक बचाउ अभियानका लागि प्रर्दशन गर्न लागेको बताएको छ । जिल्ला प्रशासन कार्यालयले माइतीघरमा प्रर्दशनमा निषेध गर्ने जानकारी आयोजक दुबै पक्षलाई गराएपछि प्रसाईंले पनि उक्त स्थानमा कार्यक्रम नगर्ने अनौपचारिक जानकारी आईसकेको काठमाडौं जिल्ला प्रशासन कार्यालयले जनाएको छ ।

प्रसाईंका नीजि सचिवालयका सदस्य बिनोद बजगाईले पनि मंसिर ७ मा माइतीघरमा कुनै प्रर्दशन गर्ने वा कार्यक्रम गर्ने योजना नरहेको बताएका छन् । ‘काठमाडौंमा प्रर्दशनसहितको कार्यक्रम छ तर स्थान तोकिईसकिएको छैन, भोलिसम्म कार्यक्रम स्थल तय हुन्छ,’ उनले भने । एमालेले भने युवा विद्यार्थीको कार्यक्रमको स्वामित्व लिएपनि उक्त दिन निषेधाज्ञा नतोडन, कानुन पालना गरेरै प्रर्दशन गर्न निर्देशन गरिसकेको छ ।