विदेश पठाइदिने भन्दै करोडौँ ठगी गर्ने आरोपमा ५ जना पक्राउ

चितवन, १७ असार । वैदेशिक रोजगारीका नाममा आकर्षक तलबको प्रलोभन देखाएर विभिन्न देश पठाइदिने भन्दै रकम ठगी गरेको आरोपमा प्रहरीले पाँच जनालाई पक्राउ गरेको छ।

काठमाडौँ उपत्यका अपराध अनुसन्धान कार्यालय, टेकुको टोलीले उनीहरूलाई काठमाडौँका विभिन्न स्थानबाट पक्राउ गरेको हो।

पक्राउ पर्नेमा सिन्धुपाल्चोकका ४२ वर्षीय वाङ्दी लामा, रामेछापका ३८ वर्षीय ललितबहादुर तामाङ, धादिङकी ३४ वर्षीया सन्तोषी लामा, चन्द्रागिरीका ४१ वर्षीय रामदास महर्जन र काठमाडौँ–१५ का २९ वर्षीय सरिब गिरी रहेका छन्।

प्रहरीका अनुसार वाङ्दीले अजरबैजान पठाइदिने भन्दै एक जनाबाट ५० हजार रुपैयाँ, ललितबहादुरले कोसोभो पठाइदिने भन्दै २ लाख ५० हजार रुपैयाँ र सन्तोषीले स्पेन पठाइदिने भन्दै एक जनाबाट १५ लाख रुपैयाँ ठगी गरेका थिए।

यस्तै, रामदासले यूएई पठाइदिने भन्दै सात जना पीडितबाट ४५ लाख रुपैयाँ र सरिबले क्यानडा पठाइदिने भन्दै एक जनाबाट २० लाख रुपैयाँ लिएर सम्पर्कविहीन भएको उजुरी परेको प्रहरीले जनाएको छ।

पीडितहरूको उजुरीका आधारमा प्रहरीले उनीहरूलाई काठमाडौँका विभिन्न स्थानबाट पक्राउ गरेको हो। पक्राउ परेका सबैलाई थप अनुसन्धान तथा कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।