नेपाल ब्ल्याक लिस्टमा पर्ने उच्च जोखिममा छ : अर्थमन्त्री स्वर्णिम वाग्ले
प्रकाशित मिति: शनिबार, आषाढ २०, २०८३ | १७:०४:४५
चितवन, २० असार । अर्थमन्त्री डा. स्वर्णिम वाग्लेले नेपाल सम्पत्ति शुद्धीकरण (मनी लाउन्ड्रिङ) सम्बन्धी अन्तर्राष्ट्रिय निगरानीको ग्रे लिस्टबाट ब्ल्याक लिस्टमा पर्न सक्ने उच्च जोखिममा रहेको चेतावनी दिएका छन्।
शनिबार राष्ट्रिय सभामा सम्पत्ति शुद्धीकरण (मनी लाउन्ड्रिङ) निवारण (तेस्रो संशोधन) विधेयक, २०८३ माथिको छलफलमा उठेका प्रश्नको जवाफ दिँदै उनले आवश्यक कानुनी सुधार, सुशासन र वित्तीय अनुशासनमा तत्काल प्रभावकारी काम गर्न नसके नेपाल ब्ल्याक लिस्टमा पुग्ने अवस्था आउन सक्ने बताए।
उनले ब्ल्याक लिस्टमा परे नेपालले अन्तर्राष्ट्रिय वित्तीय प्रणालीसँगको सम्बन्धमा गम्भीर असर भोग्नुपर्ने र विदेशी लगानी तथा वित्तीय कारोबारमा ठूलो चुनौती सिर्जना हुने उल्लेख गरे।
अर्थमन्त्री वाग्लेले नेपालको अन्तर्राष्ट्रिय साख जोगाउन तथा सुधार गर्न सुशासन, वित्तीय अनुशासन र अन्तर्राष्ट्रिय मापदण्डको प्रभावकारी कार्यान्वयन अपरिहार्य रहेको बताए। उनले २०८१ फागुनदेखि ग्रे लिस्टमा रहेको अवस्थाबाट मुलुकलाई बाहिर निकाल्न सरकार तदारुकताका साथ काम गरिरहेको पनि जानकारी दिए।
प्रकाशित मिति : शनिबार, आषाढ २०, २०८३ |
१७:०४:४५
199
