सिरहामा वन कार्यालय प्रमुख १२ हजार रुपैयाँ घुससहित पक्राउ, साथबाट १.४५ लाख रुपैयाँ बरामद

चितवन, २४ आषाढ । अख्तियार दुरुपयोग अनुसन्धान आयोगले सिरहाको सब-डिभिजन वन कार्यालय, बन्दीपुरका कार्यालय प्रमुख राम केवल राय यादवलाई १२ हजार रुपैयाँ घुस लिएको आरोपमा पक्राउ गरेको छ।

उद्योगका लागि ल्याइएको काठ सिलबन्दीअनुसार भए–नभएको रुजु गरी आवश्यक कागजातसहितको फाइल फिर्ता गर्ने क्रममा सेवाग्राहीलाई अनावश्यक दुःख हैरानी दिँदै घुस मागेको उजुरीपछि अख्तियारको कार्यालय, बर्दिवासबाट खटिएको टोलीले उनलाई नियन्त्रणमा लिएको हो।

यादवलाई सिरहाको कर्जन्हा नगरपालिका–४ अन्तर्गत मिर्चौया–बन्दीपुर सडकखण्डमा सेवाग्राहीबाट १२ हजार रुपैयाँ घुस लिइसकेको अवस्थामा पक्राउ गरिएको अख्तियारले जनाएको छ।

खानतलासीका क्रममा उनको साथबाट घुसबापतको १२ हजार रुपैयाँसहित स्रोत नखुलेको थप १ लाख ३३ हजार १२० रुपैयाँ बरामद भएको छ। यससँगै कुल १ लाख ४५ हजार १२० रुपैयाँ नगद र एउटा मोबाइल पनि बरामद गरिएको आयोगका प्रवक्ता सुरेश न्यौपानेले जानकारी दिए।

घटनाबारे थप अनुसन्धान भइरहेको अख्तियारले जनाएको छ।