प्रधानमन्त्रीले बिचौलिया, दलाल र माफिया परिचालन गर्छन् : डा. गोविन्द केसी

काठमाडौं , १५ साउन । डा. गोविन्द केसीले प्रधानमन्त्री पुष्पकमल दाहालले आफैँ बीचौलिया, दलाल र माफियाहरू परिचालन गर्ने गरेको आरोप लगाएका छन् । चिकित्सा शिक्षा सुधारका लागि लागिरहेका डा. केसीले सोमबार पत्रकार सम्मेलन गर्दै जनुसुकै पार्टीका प्रधानमन्त्री आए पनि माफियालाई सजिलो हुने गरी काम गर्ने गरेको बताए । पछिल्लो समय सीटीईभीटी र चिकित्सा शिक्षा आयोगबीचको विवादबारे डा. केसीले भने, ‘यी जनताका होइनन् कि माफियाका प्रधानमन्त्री हुन् ।’

चिकित्सा शिक्षा आयोगका उपाध्यक्षलाई प्रधानमन्त्री दाहालकै क्वाटरमा एक माफियाले जागिर खाइदिने धम्की दिएको भन्दै डा. केसीले बताए । उनले भने, ‘प्रधानमन्त्रीकै कोठामा बसेर त्यस्तो बोल्ने आँट तिनलाई किन आयो ? त्यो माफिया बोलेको होइन, स्वयं आयोगका अध्यक्ष प्रधानमन्त्री बोलेका हुन् । किनकि, प्रधानमन्त्रीहरु बिचौलिया, दलाल र माफियाहरू परिचालन गर्छन् ।’

यसअघिका प्रधामन्त्रीहरुले पनि मेडिकल माफियालाई सहज हुने गरी चिकित्सा शिक्षा ऐन संशोधन गर्ने प्रयास गरेको तर नसकेको उनको आरोप छ । डा. केसीले पछिल्लो समय चिकित्सा क्षेत्रको मुख्य नियामक निकाय चिकित्सा शिक्षा आयोगलाई निस्तेज पार्ने र चिकित्सा शिक्षा ऐनका प्रावधानहरु उल्ट्याउने संगठित प्रयास भइरहेको बताए ।