रिगलद्वारा प्रहरी समक्ष आत्मसमर्पण

काठमाडौँ । आममाफी दिने राष्ट्रपतिको निर्णय बदर गर्ने सर्वोच्चको आदेशपछि रिगल भनिने योगराज ढकालले बाँके प्रहरीसमक्ष आत्मसमर्पण गरेका छन् । उनले जिल्ला प्रहरी कार्यालय बाँकेमा आत्मसमर्पण गरेका हुन् । रिगलले हत्या गरेका नेपालगञ्जका चेतन मानन्धरकी पत्नी भारती शेर्पाको तर्फबाट दायर भएको रिटमाथि सुनुवाइ गर्दै बिहीबार सर्वोच्चले राष्ट्रपतिको निर्णय बदर गर्न आदेश दिएको हो ।

सर्वोच्चले उनलाई तत्काल पक्राउ गरेर पुन कारागार चलान गर्न पनि निर्देशन दिएको थियो । रिगललाई असोज ३ गते संविधान दिवसको अवसर पारेर राष्ट्रपति रामचन्द्र पौडेलले आममाफी दिएका थिए। सो निर्णयको विरुद्धमा भारती सर्वोच्च अदालत पुगेकी थिइन्।

कायममुकायम प्रधानन्यायाधीश ईश्वरप्रसाद खतिवडा तथा न्यायाधीशहरू सपना प्रधान मल्ल र कुमार चुडालको इजलासले बुधबारसम्म दुवै तर्फको बहस सुनिसकेपछि आज निर्णय सुनाएको थियो । २०७२ असार २८ गते बाँकेको नेपालगन्ज–१६ स्थित मुख्य सडकमै रहेको ज्योति सिम्ताली होटेलअगाडि रिगलसहित करिब १५ जनाको समूहले स्थानीय चेतन मानन्धरको हत्या गरेको पुष्टि भएको थियो ।

सोही प्रकरणमा बाँके जिल्ला अदालतका न्यायाधीश विष्णु सुवेदीको इजलासले २०७५ वैशाख ११ गते रिगललाई जन्मकैदको सजाय हुने फैसला सुनाएको थियो। २०७२ भदौ ७ गते पक्राउ परेका उनलाई २०९२ भदौ ६ गतेसम्म कैद गर्नुपर्ने फैसला भए पनि गत असोज ३ गते संविधान दिवसको अवसरमा सरकारको सिफारिसमा राष्ट्रपतिले रिगलको बाँकी कैद मिनाहा गरिदिएका थिए।