साढे ४२ करोड डलर गुगललाई जरिवाना

चितवन, १९ भाद्र ।  अमेरिकाको एक संघीय अदालतले गुगललाई साढे ४२ करोड डलर जरिवाना तिर्न आदेश दिएको छ ।

करौंडौं प्रयोगकर्ताका डेटा थुपारेर गोपनियता उल्लंघन गरेको मामिलामा उक्त जरिवाना तिर्न आदेश दिएको हो ।

आफ्नो गुगल खातामा प्रयोगकर्ताले ट्र्याकिङ फिचर अफ गर्दा गर्दै पनि कम्पनीले डेटा संकलन गरेको पाइएपछि यो जरिवाना तिराइएको हो । कम्पनीले प्रयोगकर्ताको मोबाइल उपकरणमा पहुँच बनाएर आफ्नो डेटा जम्मा पारेको, सेभ गरेर राखेको अनि त्यसलाई प्रयोग गरेको दाबी गर्दै प्रयोगकर्ताले कम्पनीमाथि हालेको मुद्दाको सुनवाइ गर्ने क्रममा यो फैसला आएको हो ।

यस मुद्दामा प्रयोगकर्ताले ३१ अर्ब डलरभन्दा बढीको क्षतिपूर्ति माग गरेका थिए । यो निर्णयले कम्पनीको प्रडक्टले कसरी काम गर्छ भन्ने कुरा गलत तरिकाले बुझेको भन्दै यसको विरुद्ध पुनरावेदन अदालतमा जाने गुगलले बताएको छ ।