अमेरिका–इरानबीच अन्तरिम शान्ति सम्झौता सार्वजनिक, स्थायी युद्धविरामका लागि ६० दिनको समय

चितवन, ०४ असार । अमेरिका र इरानले युद्ध अन्त्यतर्फ अग्रसर हुने उद्देश्यसहित अन्तरिम शान्ति सम्झौताको पाठ बुधबार सार्वजनिक गरेका छन्। अधिकारीहरूका अनुसार अमेरिकी राष्ट्रपति डोनाल्ड ट्रम्प र इरानी राष्ट्रपति मसूद पेजेस्कियानले समझदारीपत्र (एमओयू) मा डिजिटल हस्ताक्षर गरिसकेका छन् भने इरानको परराष्ट्र मन्त्रालयले सम्झौता तत्काल लागू भएको जनाएको छ।

दुवै देशबीचको उक्त अन्तरिम शान्ति सम्झौतामा औपचारिक हस्ताक्षर भने आज स्वीट्जरल्याण्डमा हुने तयारी गरिएको छ।

रोयटर्सका अनुसार सम्झौताका प्रमुख बुँदामा लेबनानसहित सबै मोर्चामा तत्काल युद्ध अन्त्य, हर्मुज जलडमरूमध्यमा समुद्री आवतजावत पूर्णरूपमा सुचारु गर्ने, इरानी बन्दरगाहमाथिको अमेरिकी नाकाबन्दी हटाउने, इरानमाथिका अमेरिकी प्रतिबन्ध फुकुवा गर्ने तथा रोक्का गरिएका सम्पत्ति खुला गर्ने विषय समेटिएका छन्।

यस्तै, इरानको आर्थिक पुनर्स्थापनाका लागि ३०० अर्ब अमेरिकी डलरको योजना कार्यान्वयन गर्ने तथा इरानले परमाणु हतियार नबनाउने आफ्नो दीर्घकालीन प्रतिबद्धता पुनः दोहोर्‍याउने उल्लेख गरिएको छ।

सम्झौताले गत अप्रिलमा घोषणा गरिएको युद्धविरामलाई थप ६० दिनका लागि विस्तार गरेको छ। यो अवधिमा दुवै पक्षले स्थायी शान्ति सम्झौताका लागि वार्तालाई तीव्रता दिने जनाइएको छ।

यसैबीच अमेरिकी राष्ट्रपति ट्रम्पले इरानले सम्झौताअनुसारका प्रतिबद्धता पूरा नगरे कडा कदम चाल्न सकिने चेतावनी दिएका छन्। फ्रान्समा जारी जी–७ शिखर सम्मेलनका क्रममा पत्रकारहरूसँग कुरा गर्दै उनले सम्झौताको सम्मान गर्न इरानलाई आग्रह गरे।

ट्रम्पले इरानीहरूलाई ‘स्मार्ट मानिस’को संज्ञा दिँदै आगामी ६० दिनभित्र स्थायी युद्धविराम सुनिश्चित गर्न दुवै देशका वार्ताकारहरू सक्रिय रूपमा काम गरिरहेको बताए।