विश्वकप स्थान पक्का गरिसकेको नेपाल आज सामाओसँग उपाधि निर्णायक खेलमा

चितवन, ३१ असोज । ओमानमा जारी इस्ट एसिया प्यासिफिक क्वालिफायरबाट विश्वकपमा स्थान बनाइसकेको नेपाल आज छनोटको उपाधिका लागि सुपर सिक्सको अन्तिम खेलमा सामाओसँग प्रतिस्पर्धा गर्दैछ। दुई खेल अगावै भारत र श्रीलङ्कामा आगामी वर्ष हुने आइसिसी टी–२० विश्वकपमा पुगेको नेपाल उपाधिको एक कदम टाढा छ। बुधबार राति बलियो प्रतिद्वन्द्वी ओमानलाई ३८ रनले पराजित गरेपछि नेपालको उपाधि जित्ने सम्भावना थप प्रबल बनेको हो।

सुपर सिक्सको अंक तालिकामा नेपाल ८ अङ्कसहित शीर्षस्थानमा छ। दोस्रो र तेस्रो स्थानमा क्रमशः यूएई र ओमान ६–६ अङ्कसहित रहेका छन्। यूएईले आफ्नो खेल सकाइसकेको छ भने ओमानले आज जापानसँग अन्तिम खेल खेल्दैछ। नेपालले आज सामाओलाई पराजित गर्न सकेमा अपराजित रहँदै १० अङ्कसहित छनोटको उपाधि हात पार्नेछ। यदि नेपाल पराजित भयो र ओमानले जापानलाई हरायो भने, उपाधि रनरेटका आधारमा निर्धारण हुनेछ। तर, जापानले ओमानलाई हराए भने नेपाल खेलअघि नै उपाधि जित्ने निश्चित हुनेछ।

सामाओ अंकबिहीन पुछारमा रहेको टोली हो। कप्तान रोहित पौडेलका अनुसार, विश्वकपमा स्थान सुरक्षित भएपछि अहिले टिमको लक्ष्य उपाधि जित्नु हो। तेस्रो पटक विश्वकपमा पुगेको नेपाल पहिलो पटक छनोटको उपाधि उचाल्ने लक्ष्यमा छ। नेपाल र सामाओबीचको उपाधि निर्णायक खेल आज (शुक्रबार) दिउँसो ४:१५ बजे ओमानको मैदानमा सुरु हुनेछ।