चितवन, २१ पुष । नेपाल स्टक एक्सचेञ्ज (नेप्से) परिसूचक आज २८ दशमलव ७३ अङ्कले बढेर दुई हजार ६३९ दशमलव ३७ बिन्दुमा कायम भएको छ । यो अघिल्लो कारोबार दिनको तुलनामा एक दशमलव १० प्रतिशतको वृद्धि हो ।

आजको कारोबारमा ३३५ कम्पनीका एक करोड २४ लाख ५९ हजार ९५१ कित्ता शेयर ८४ हजार ९९० पटक किनबेच हुँदा कुल कारोबार रकम रु ६ अर्ब ४७ करोड ३७ लाख ३६ हजार ९९ पुगेको छ ।

कारोबार भएका सबै समूहका उपसूचकहरू बढेका छन् । सबैभन्दा बढी उत्पादन तथा प्रशोधन समूह तीन दशमलव ०५ प्रतिशतले उकालो लागेको छ भने विकास बैंक समूह दुई दशमलव ७० र होटल तथा पर्यटन समूह दुई दशमलव ५३ प्रतिशतले बढेका छन् । त्यसैगरी बैंकिङ, वित्त, जीवन बीमा, जलविद्युत्, लगानी, लघुवित्त, म्युचुअल फण्ड, निर्जीवन बीमा, व्यापार तथा अन्य समूहका सूचकहरू पनि सकारात्मक देखिएका छन् ।

आज सागर डिस्टिलरी लिमिटेड, एसवाई प्यानल नेपाल लिमिटेड, श्रीनगर एग्रीटेक एन्डस्ट्रीज लिमिटेड, बन्दीपुर केबलकार एण्ड टुरिजम लिमिटेड र रुरु जलविद्युत् परियोजना लिमिटेडको शेयर मूल्यमा सकारात्मक सर्किट लागेको छ । सबैभन्दा धेरै घट्नेमा स्टाण्डर्ड चार्टर्ड बैंक लिमिटेड डिबेन्चर रहेको छ, जसको मूल्य दुई दशमलव ४९ प्रतिशतले घटेको छ ।

कारोबार रकम र शेयर सङ्ख्याका आधारमा आज सबैभन्दा बढी शिवम सिमेन्ट लिमिटेडको रु ३८ करोड ६९ लाख ५० हजार ३४७ बराबरको छ लाख २२ हजार ८४० कित्ता शेयर किनबेच भएको छ ।