नेपाली चलचित्र संग्रहालयको औपचारिक शुभारम्भ, ऐतिहासिक सामग्री हस्तान्तरण

चितवन, १३ फाल्गुण । चलचित्र विकास बोर्डले नेपाली चलचित्र संग्रहालयको औपचारिक शुभारम्भ गरेको छ। नेपाली चलचित्रको इतिहास, कला र प्रविधिलाई भावी पुस्तासम्म सुरक्षित राख्ने उद्देश्यसहित मंगलबार सञ्चार तथा सूचना प्रविधि मन्त्रालयका सचिव लक्ष्मीकुमारी बस्नेतको उपस्थितिमा संग्रहालय उद्घाटन गरिएको हो।

उद्घाटन कार्यक्रममा चलचित्रकर्मी तथा विभिन्न संस्थाले ऐतिहासिक क्यामेरा, क्यासेट, टेप, पोस्टर, आर्टवर्क, स्क्रिप्ट तथा अन्य संग्रहयोग्य सामग्री हस्तान्तरण गरेका थिए।

संग्रहालयलाई समृद्ध बनाउन विभिन्न क्षेत्रका चलचित्रकर्मी र संस्थाहरूले महत्वपूर्ण योगदान दिएका छन्। सिने फोकस प्रा.लि. (रजत बुढाथोकी)ले रेड क्यामेरा प्रदान गरेका छन् भने क्लासिक सिने युनिभर्स प्रा.लि. (दिनेश महरा)ले सोनी इएक्स–३ क्यामेरा उपलब्ध गराएका छन्।

चलचित्र सम्पादक मानबहादुर थापाले सन् १९८० को पानासोनिक एफ–१० क्यामेरा, सन् २००१ को सोनी कलर मोनिटर, नेशनल पानासोनिक ५४३ क्यासेट टेप, साउन्ड/भिडियो उपकरण तथा अडियो मिक्सर संग्रहालयलाई हस्तान्तरण गरेका छन्।

यसैगरी, म्युजिक नेपालका प्रबन्ध निर्देशक उत्तम थापाले १५२ वटा नेपाली चलचित्रका पोस्टर तथा आर्टवर्क प्रदान गरेका छन् भने ओएसआरका रुपेन्द्र खड्गीले पनि विभिन्न चलचित्र आर्टवर्क उपलब्ध गराएका छन्।