अध्यादेश छद्म उद्देश्यका लागि होइन, द्रुत कामका लागि ल्याइएको हो : मन्त्री गौतम

चितवन , २० बैशाख । कानुनमन्त्री सोविता गौतम ले सरकारले हालै ल्याएका अध्यादेशहरू कुनै छद्म उद्देश्य पूर्तिका लागि नभई कामलाई छिटो र प्रभावकारी बनाउन ल्याइएको स्पष्ट पारेकी छन्।

सरकारले छ वटा अध्यादेश जारी गरेपछि उठेका आलोचनाबीच उनले सामाजिक सञ्जालमार्फत भिडियो सन्देश जारी गर्दै यस्तो धारणा व्यक्त गरेकी हुन्। संसदमार्फत ‘फास्ट ट्र्याक’ प्रक्रियाबाट कानुन निर्माण गर्दा पनि कम्तिमा तीनदेखि चार महिना लाग्न सक्ने भएकाले तत्काल आवश्यक निर्णय गर्न अध्यादेशको सहारा लिनुपरेको उनको भनाइ छ।

उनका अनुसार केही क्षेत्रमा कानुनी अस्पष्टता वा अभावका कारण काम अघि बढाउन कठिन भइरहेको छ। यस्ता अवरोध हटाउँदै द्रुत गतिमा निर्णय लिन अध्यादेश आवश्यक भएको उनले बताइन्।

मन्त्री गौतमले विगतमा अध्यादेशको दुरुपयोग भएका उदाहरणहरू रहेकाले अहिले पनि अविश्वास र आलोचना हुनु स्वाभाविक भएको उल्लेख गरिन्। तर वर्तमान सन्दर्भ फरक रहेको बताउँदै उनले सरकारले जनताका समस्या छिटो समाधान गर्न अध्यादेश ल्याएको स्पष्ट पारिन्।

उनले भनिन्, “यो अध्यादेश राम्रो काम गर्न, छिटो काम गर्न र सरकारलाई अझ प्रभावकारी बनाउन ल्याइएको हो। संसदमार्फत विधेयक पारित गर्दा समय लाग्ने भएकाले द्रुत गतिमा काम गर्न अध्यादेश सिफारिस गरिएको हो।”