स्वतन्त्र प्रेसबिना सुशासन सम्भव छैन : सञ्चारमन्त्री तिमिल्सिना

चितवन , २० बैशाख । सञ्चार तथा सूचना प्रविधिमन्त्री बिक्रम तिमिल्सिना ले स्वतन्त्र प्रेसबिना सुशासन, पारदर्शिता र जनविश्वास मजबुत हुन नसक्ने बताएका छन्।

विश्व प्रेस स्वतन्त्रता दिवसको अवसरमा जारी शुभकामना सन्देशमा उनले स्वतन्त्र, निष्पक्ष र जिम्मेवार प्रेसलाई लोकतन्त्रको आधारस्तम्भका रूपमा व्याख्या गर्दै सार्वजनिक उत्तरदायित्व सुनिश्चित गर्न यसको भूमिका निर्णायक हुने उल्लेख गरेका छन्।

मन्त्री तिमिल्सिनाका अनुसार सञ्चारमाध्यम केवल सूचना प्रवाह गर्ने माध्यममा सीमित नभई राजनीति, प्रशासन, निजी क्षेत्र र समग्र समाजलाई जवाफदेही बनाउने महत्वपूर्ण संस्था हो। त्यसैले प्रेस स्वतन्त्रतासँगै उच्चस्तरीय जिम्मेवारी पनि आवश्यक रहेको उनले जोड दिएका छन्।

उनले नेपालको संविधानले सुनिश्चित गरेको प्रेस तथा अभिव्यक्ति स्वतन्त्रताप्रति सरकार पूर्ण प्रतिबद्ध रहेको स्पष्ट पार्दै स्वतन्त्र प्रेसले मात्र सुशासन र पारदर्शिता दिगो बनाउन सक्ने धारणा व्यक्त गरे।

साथै, तथ्यप्रतिको निष्ठा, व्यावसायिक मर्यादा र सार्वजनिक हितप्रतिको उत्तरदायित्वलाई समान रूपमा महत्त्व दिनुपर्नेमा उनले जोड दिएका छन्। डिजिटल युगमा फैलिँदै गएको गलत सूचना र भ्रामक सामग्रीले चुनौती थपेको भन्दै उनले सत्य र तथ्यमा आधारित पत्रकारिताको आवश्यकता अझ बढेको बताएका छन्।

उनले समाजलाई सचेत, जिम्मेवार र लोकतान्त्रिक दिशामा अघि बढाउन सञ्चार क्षेत्रको भूमिका महत्वपूर्ण रहने उल्लेख गर्दै सम्पूर्ण पत्रकारप्रति सम्मान व्यक्त गरेका छन्।