दुर्गा प्रसाईंमाथि राज्यविरुद्धको कसुरमा अनुसन्धान, अदालतबाट ३ दिन म्याद थप

चितवन, ०५ जेठ । पर्सा जिल्ला अदालतले मेडिकल व्यवसायी तथा ‘राष्ट्र, राष्ट्रियता, धर्म संस्कृति र नागरिक बचाउ महाअभियान नेपाल’का संयोजक दुर्गाप्रसाद प्रसाईंलाई अनुसन्धानका लागि तीन दिन म्याद थप गर्न अनुमति दिएको छ। उनीमाथि विद्युतीय कारोबार ऐन तथा राज्यविरुद्धको कसुरअन्तर्गत अनुसन्धान भइरहेको प्रहरीले जनाएको छ।

पर्सा प्रहरीले प्रसाईंलाई सोमबार राति वीरगञ्जस्थित सिद्धार्थ दियालो होटलबाट ‘जरुरी पक्राउ पुर्जी’का आधारमा नियन्त्रणमा लिएको थियो।

जिल्ला प्रहरी कार्यालय पर्साका प्रवक्ता हरिबहादुर बस्नेतका अनुसार प्रसाईंले विभिन्न सञ्चारमाध्यम र सामाजिक सञ्जालमार्फत सार्वजनिक नैतिकता तथा शिष्टाचारविरुद्ध अभिव्यक्ति दिएको, घृणा र द्वेष फैलाउने तथा विभिन्न जातजाति र समुदायबीचको सद्भाव बिगार्ने खालका अभिव्यक्ति दिएको आरोप छ।

प्रहरीका अनुसार नेपाल सरकारप्रति घृणा, द्वेष वा अवहेलना हुने गरी अमर्यादित र अप्रमाणित अभिव्यक्ति दिएको आरोपमा उनलाई नियन्त्रणमा लिएर थप अनुसन्धान अघि बढाइएको हो।