मोबाइलको विवादले लियो ज्यान: बागलुङमा साथीकै कुटपिटबाट १७ वर्षीय किशोरको हत्या

चितवन, १० साउन । मोबाइल नदिएको सामान्य विवादले बागलुङमा एक किशोरको ज्यान गएको खुलेको छ। बडिगाड गाउँपालिका–१ का १७ वर्षीय लजिन थापा आफ्नै साथीहरूको कुटपिटबाट मारिएको प्रहरीले जनाएको छ।

साउन १ गते साथी असिम वनको जन्मदिन मनाउन गएका लजिनको शव बिहीबार स्थानीय मनखोलामा फेला परेको थियो। घटनामा संलग्न रहेको आरोपमा प्रहरीले २० वर्षीय रेमबहादुर विक, १९ वर्षीय सुदीप विक, १६ वर्षीय असिम वन र १५ वर्षीय ददी परियारलाई नियन्त्रणमा लिएको जिल्ला प्रहरी कार्यालयले जनाएको छ।

प्रहरीका अनुसार जन्मदिन मनाउने क्रममा साथीहरूले राति अबेरसम्म मदिरा सेवन गरेका थिए। घर फर्कने क्रममा लजिनसँग रहेको आइफोन माग्दा नदिएपछि विवाद चर्किएको र त्यसपछि कुटपिट भएको प्रारम्भिक अनुसन्धानबाट खुलेको छ।

जिल्ला प्रहरी कार्यालयका प्रहरी उपरीक्षक फडिन्द्र प्रसाईंका अनुसार कुटपिटबाट लजिन बेहोस भएपछि उनको मृत्यु भएको र घटनालाई लुकाउन शव घटनास्थलबाट करिब आधा घण्टाको दूरीमा रहेको मनखोलामा लगेर फालिएको थियो।

अनुसन्धानका क्रममा जन्मदिन मनाउन सात जना सहभागी भए पनि अन्य साथीहरू घर फर्किएपछि रेमबहादुर विक र ददी परियारले लजिनलाई पछ्याएर एकान्त स्थानमा आक्रमण गरेको खुलेको प्रहरीले जनाएको छ। घटनाको राति करिब २:३० बजेसम्म उनीहरू स्थानीय दगातुम्डाँडा प्राथमिक विद्यालयमा बसेर मदिरा सेवन गरेको पनि अनुसन्धानबाट पुष्टि भएको छ। जन्मदिन कार्यक्रममा नौ वर्षीय एक बालकसमेत सहभागी रहेको प्रहरीले जनाएको छ।

लजिन एक सातासम्म सम्पर्कविहीन भएपछि प्रहरीले प्राविधिक विज्ञ, तालिमप्राप्त कुकुर तथा ड्रोन क्यामेराको सहयोगमा खोजी अभियान सञ्चालन गरेको थियो। त्यसपछि शव फेला परेपछि घटनाको रहस्य खुलेको हो।

प्रहरीले पक्राउ परेका चार जनाविरुद्ध व्यक्ति बेपत्ता पारेको कसुरमा मुद्दा दर्ता गरी थप अनुसन्धान अघि बढाएको जनाएको छ।

काठमाडौँको धुम्रबाराहीस्थित साइपल कलेजमा कक्षा ११ मा अध्ययनरत लजिन केही समयअघि बिदामा घर आएका थिए। साथीको जन्मदिन मनाउन गएका उनी अन्ततः आफ्नै साथीहरूको हिंसाको सिकार बने।