फेसबुक स्टन्ट गर्दा उपप्रधानमन्त्री सिंह विवादमा

चितवन, ०३ साउन । उपप्रधानमन्त्री एवं सहरी विकासमन्त्रीमा नियुक्त प्रकाशमान सिंहले फेसबुक स्टन्ट गर्दा मन्त्री भएकाे दाेस्राे दिनमै विवादमा तानिएका छन् । खासमा साेमबार उपप्रधानमन्त्री नियुक्त भएका सिंहलाई मङ्गलबार बधाई दिन नेपाल प्रहरीका आइजिपी बसन्त कुँवर , सशस्त्र प्रहरीका आइजीपी राजु अर्याल र राष्ट्रिय अनुसन्धान विभागका प्रमुख हुतराज थापा मन्त्रालयमा पुगेका थिए । त्यही शिष्टाचारभेटलाई उपप्रधानमन्त्री सिंहले आफ्नो पदीय मर्यादा बिर्सँदै तीनवटै सुरक्षा निकायका प्रमुखलाई बाेलाएर सुरक्षा अवस्थाबारे जानकारी लिएकाे भन्दै फेसबुक स्टन्ट गर्न खाेजे । उनको स्टाटससँगै अहिले फेसबुकभरी उपप्रधानमन्त्री सिंह सहरी विकासमन्त्री हुन् कि गृहमन्त्री हुन् भन्दै खिल्ली उडाइरहेका छन् ।

आफुलाई बधाई दिन आएकालाई निर्देशन दिएको भन्दै स्टाटस लेखेपछि उनले आफ्नो पदीय गरिमा राख्न नसकेको भन्दै आलोचना समेत भएको छ । जवकी गृहमन्त्री कांग्रेसकै रमेश लेखक छन् । शक्तिका हिसाबले कांग्रेस सभापति शेरबहादुर देउवाका पत्नी आरजु राणानै मन्त्रीमण्डलामा छन् । यस अवस्थामा सिंहले सुरक्षा निकायमा कुनै ठुलाे प्रभाव पार्न सक्ने हैसियतमा छैनन् । त्यस्तै उनकाे साेही फेसबुक स्टाटसकाे फाेटाेमा समेत चर्काे आलोचना भइरहेको छ । बधाई दिन आएका प्रहरी प्रमुखले बुके उपहार दिँदा सामान्य शिष्टाचारसमेत नराखी बसेरै फूल लिएका छन् ।

गणेशमान सिंहका छाेरा प्रकाशमान सिंहले सामान्य व्यवहार नदेखाएर राजसी व्यवहार देखाएकाे भन्दै आलोचना भइरहेकाे छ । गत कांग्रेस महाधिवेशनमा गुट फेरेर कांग्रेस सभापतिमा देउवालाई सघाए बापत पुरस्कार स्वरुप अहिले उपप्रधानमन्त्री पाएका सिंहले पदलोलुप देखाउँदै मध्यम मन्त्रालय मानिने सहरी विकासमन्त्रालयमा चित्त बुझाएको आरोप लागेको छ ।