त्रिवि दीक्षान्त समारोहमा १४ हजार विद्यार्थी सहभागी हुँदै

चितवन, १३ पौष । त्रिभुवन विश्वविद्यालयको यसपटकको दीक्षान्त समारोहमा १४ हजार विद्यार्थी सहभागी हुने भएका छन् । त्रिविले शनिबार दशरथ रंगशाला त्रिपुरेश्वरमा दीक्षान्त समारोह आयोजना गर्दै छ । यस वर्ष उत्तीर्ण हुने विद्यार्थी संख्याका आधारमा भने यो संख्या न्यून हो ।

तर, यसपटकको दीक्षान्त समारोहमा धेरै विद्यार्थीको सहभागिता रहेको त्रिविका रजिस्ट्रार प्रा.डा. केदार रिजालले बताए । उनका अनुसार यसपटक दीक्षित हुन योग्य विद्यार्थी अर्थात् उत्तीर्ण विद्यार्थी संख्या ७४ हजार ४५ हो ।

तर, १४ हजार ३०८ ले मात्रै दीक्षान्त समारोहमा भाग लिँदै छन् । गत वर्ष त्रिपुरेश्वर रंगशालामै भएको दीक्षान्त समारोहमा १२ हजार विद्यार्थी दीक्षित भएका थिए । त्रिविका परीक्षा नियन्त्रक पुष्पराज जोशीले दीक्षित हुने विद्यार्थीको संख्या बढेको र ठाउँ व्यवस्थापन गर्न कठिन भएको बताए । ‘गत वर्षभन्दा विद्यार्थी संख्या धेरै भयो, ग्राउन्डमा नअट्ने समस्या छ,’ उनले भने, ‘कसरी व्यवस्थापन गर्ने भइरहेको छ ।’