४५औँ विश्व खाद्य दिवस ‘स्वच्छ खाना, सुखद भविष्यका लागि हातेमालो’ नारासहित मनाइँदै
चितवन, ३० असोज । सरकारले बिहीबार विश्वभर स्वच्छ, पोषणयुक्त र सन्तुलित भोजनको महत्त्वबारे जनचेतना फैलाउने उद्देश्यले ४५औँ विश्व खाद्य दिवस मनाउँदै छ। कृषि विभागले संयुक्त राष्ट्र सङ्घको खाद्य तथा कृषि सङ्गठन (एफएओ) तथा विभिन्न सङ्घ–संस्थाको सहकार्यमा दिवस मनाउने तयारी गरेको हो। यस वर्षको नारासहित — ‘स्वच्छ खाना र सुखद भविष्यका लागि हातेमालो’ — समारोह देशभर मनाइँदैछ।
कार्यक्रम सञ्चालनका लागि कृषि विभागका महानिर्देशक प्रकाशकुमार सञ्जेलको अध्यक्षतामा मूल समारोह समिति गठन गरिएको छ।
महानिर्देशक सञ्जेलका अनुसार, खाद्य वस्तुको प्रदर्शनी, जानकारीमूलक कार्यक्रम, पोस्टर र सन्देश प्रकाशन तथा प्रसारणलगायत माध्यमबाट दिवस मनाइनेछ। साथै, राष्ट्रिय तथा अन्तर्राष्ट्रिय गैरसरकारी संस्थाहरूको सहकार्यमा प्रचारप्रसार, अन्तरक्रिया, रचनात्मक लेख प्रकाशन र विविध कार्यक्रमहरू आयोजना गरिने छन्।
