मङ्सिर २० देखि समानुपातिक निर्वाचन कार्यक्रम शुरू

चितवन, १६ मंसिर । आसन्न प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीको कार्यक्रम मङ्सिर २० गतेदेखि लागू हुने भएको छ। आइतबारदेखि निर्वाचन आयोगको कान्तिपथस्थित कार्यालयमा समानुपातिकतर्फका निर्वाचन अधिकृतको कार्यालय स्थापना गरेसँगै औपचारिक तयारी सुरु भएको हो।

निर्वाचन आयोगले सार्वजनिक गरेको कार्यक्रम अनुसार मङ्सिर २१ गते बिहान १० बजेदेखि २३ गते दिउँसो ४ बजेसम्म समानुपातिक प्रणालीमा भाग लिन इच्छुक राजनीतिक दलले निवेदन पेस गर्न सक्नेछन्। मङ्सिर २४ गते राजनीतिक दलहरूको नामावली प्रकाशित गरिनेछ।

उम्मेदवारको बन्दसूची पुस १३ र १४ गते पेस गरिनेछ भने माघ २० गते अन्तिम बन्दसूची सार्वजनिक गरिनेछ।

समानुपातिक निर्वाचन अधिकृत कार्यालयको उद्घाटन कार्यवाहक प्रमुख निर्वाचन आयुक्त रामप्रसाद भण्डारीले गर्नुभएको हो। आयोगका सचिव महादेव पन्थ समानुपातिक निर्वाचन अधिकृत र सहसचिव यज्ञप्रसाद भट्टराई सहायक निर्वाचन अधिकृतका रूपमा जिम्मेवारीमा रहनेछन्। समानुपातिक प्रणाली व्यवस्थापनका लागि ४१ कर्मचारी खटाइनेछन्।

आयुक्त भण्डारीका अनुसार कानुनमा व्यवस्था गरिएको जातीय, भौगोलिक, लैङ्गिक तथा अन्य समूहको प्रतिनिधित्व सुनिश्चित गर्न राष्ट्रिय तथ्याङ्क कार्यालयको सहयोगसँगै सूत्रात्मक विधिबाट प्रतिनिधि चयन गरिनेछ।

विद्यमान व्यवस्थाअनुसार प्रतिनिधिसभामा कुल २७५ सदस्य रहनेछन्, जसमा १६५ प्रत्यक्ष र बाँकी ११० सदस्य समानुपातिक प्रणालीबाट चयन गरिने तयारी छ। प्रत्यक्ष प्रणालीतर्फ माघ ६ गते उम्मेद्वारी मनोनयनको कार्यक्रम छ।

आइतबार नै अर्थमन्त्री रामेश्वरप्रसाद खनाल र कानुनमन्त्री अनिलकुमार सिन्हाले निर्वाचन आयोगका पदाधिकारीहरूसँग निर्वाचन पूर्वतयारी र आगामी दिनमा सरकारले गर्नुपर्ने सहयोगबारे छलफल गरेका छन्।