विश्वविद्यालयको कुलपति प्राज्ञिक व्यक्तिलाई बनाउने गृहकार्य भइरहेको छ : प्रधानमन्त्री कार्की
चितवन, २४ मंसिर । प्रधानमन्त्री एवं काठमाडौँ विश्वविद्यालयकी कुलपति सुशीला कार्कीले नेपालका विश्वविद्यालयका कुलपति प्राज्ञिक व्यक्तिहरूलाई बनाउने गृहकार्य भइरहेको जानकारी दिइन्। आज काभ्रेपलाञ्चोकको धुलिखेलस्थित काठमाडौँ विश्वविद्यालयको ३१औं दीक्षान्त समारोहको पहिलो चरणलाई सम्बोधन गर्दै उनले कुलपति चयनमा सरकार गम्भीर रहेको बताइन्। यस विषयमा उपकुलपतिसहित उच्च नेतृत्व र अन्य सरोकारवाला निकायसँग परामर्श गरेर गृहकार्य भइरहेको उल्लेख गर्दै उनले भने, “कुलपति चयनको विषयमा हामी गम्भीर छौं र सबैसँग परामर्श गर्दै काम अघि बढाइरहेका छौं।”
प्रधानमन्त्री कार्कीले हालका व्यवस्थामा प्रधानमन्त्री विश्वविद्यालयको कुलपति हुने प्रक्रिया परिमार्जन गर्नुपर्ने आवश्यकता भएको बोध गरिएको र सोहीअनुसार शिक्षामन्त्री महावीर पुनसँग छलफल र परामर्श भइरहेको जानकारी दिइन्। उनले ऐनमा संशोधन गरेर प्राज्ञिक व्यक्ति कुलपति बन्ने व्यवस्था गर्न सरकार लागिरहेको कुरा पनि स्पष्ट पारे।
यसरी प्राज्ञिक व्यक्तिहरूलाई कुलपति बनाउने व्यवस्था नेपालका उच्च शिक्षामा राजनीतिकरणको परम्परालाई अन्त्य गर्ने विश्वास रहेको बताउँदै उनले शिक्षा क्षेत्रको सुधार र गुणस्तरीयता बढाउन सरकार प्रतिबद्ध रहेको भनाइ राखिन्।
प्रधानमन्त्री कार्कीले आफू प्रधानमन्त्री बनेको नयाँ राजनीतिक परिस्थितिमा युवाहरूको बदलिँदो सोचको आधारमा गुणस्तरीय उच्च शिक्षा, सीप, रोजगारी र समृद्धिको सपना मुलुकभित्रै सम्बोधन गर्नु आवश्यक भएको धारणा व्यक्त गरिन्। उनले नेपालका उच्च शिक्षामा आर्टिफिसियल इन्टेलिजेन्स (एआई) र भर्चुअल रियालिटी प्रविधिको विकास भएको र यस्ता परिवर्तनका आकांक्षाहरू देखिनु स्वाभाविक भएको उल्लेख गरिन्।
प्रधानमन्त्रीले उच्च शिक्षामा नेपालका लगानीहरू अझ बढाउनुपर्ने आवश्यकता रहेको बताउँदै, “लगानी नबढाए यी आकांक्षाहरू पूरा गर्न सम्भव छैन,” भनिन्। उनले लगानी वृद्धिसँगै उच्च शिक्षाको गैरराजनीतिकरण पनि अहिलेको आवश्यकता भएको र शैक्षिक प्रशासनमा अनावश्यक दलीय हस्तक्षेपले नेपालको उच्च शिक्षामा असर पुर्याएको बताइन्।
कार्कीले काठमाडौँ विश्वविद्यालयले गरेको सुधार र पहललाई अन्य विश्वविद्यालयहरूले अनुशरण गर्नुपर्ने आवश्यकता पनि औँल्याइन्। उनले सस्तो मूल्यमा गुणस्तरीय शिक्षा अध्ययन गर्ने वातावरण बनाउन र शैक्षिक गुणस्तरमा उत्कृष्टता कायम राख्न शिक्षामन्त्रीमार्फत सबै सरोकारवालालाई निर्देशन दिइन्।
कार्यक्रममा शिक्षा, विज्ञान र प्रविधिमन्त्री तथा काठमाडौँ विश्वविद्यालयका सहकुलपति महावीर पुनको पनि उपस्थिति रहेको थियो। यस समारोहमा विभिन्न विधाका २,२०९ विद्यार्थी दीक्षित भएका छन्।
