काठमाडौँका १० निर्वाचन क्षेत्रमा ७ लाख १० हजारभन्दा बढी मतदाता
चितवन, ०८ माघ । सङ्घीय राजधानी रहेको जिल्ला काठमाडौँका १० वटै निर्वाचन क्षेत्रमा कुल ७ लाख १० हजार ७०८ मतदाता कायम भएका छन्। जिल्ला निर्वाचन कार्यालय काठमाडौँका अनुसार यसमा महिला मतदाता ३ लाख ६४ हजार, पुरुष मतदाता ३ लाख ४६ हजार ११६ र अन्य सात जना रहेका छन्।
आगामी फागुन २१ गते हुने प्रतिनिधिसभा सदस्य निर्वाचनका लागि काठमाडौँ जिल्लामा ३२० मतदान स्थल र ८१७ मतदान केन्द्र तोकिएको जिल्ला निर्वाचन अधिकारी ठाकुरप्रसाद भट्टराईले जानकारी दिनुभयो।
निर्वाचन क्षेत्र नं. १ मा २२ मतदान स्थल र ५७ मतदान केन्द्र रहेका छन्। यहाँ २५ हजार २५२ महिला र २३ हजार २३७ पुरुष गरी कुल ४८ हजार ८४९ मतदाता छन्। निर्वाचन क्षेत्र नं. २ मा ४० मतदान स्थल र १०० मतदान केन्द्र रहेका छन् भने यस क्षेत्रमा ४५ हजार ३१५ पुरुष र ४३ हजार ३९३ महिला गरी कुल ८८ हजार ७०८ मतदाता छन्। यो क्षेत्र काठमाडौँका सबै निर्वाचन क्षेत्रमध्ये सबैभन्दा बढी मतदाता भएको क्षेत्र हो।
यसैगरी निर्वाचन क्षेत्र नं. ३ मा २९ मतदान स्थल र ७२ मतदान केन्द्र रहेका छन्। यहाँ ३२ हजार ९२३ महिला र ३१ हजार ५५६ पुरुष गरी ६४ हजार ४७९ मतदाता छन्। निर्वाचन क्षेत्र नं. ४ मा ३३ मतदान स्थल र ८८ मतदान केन्द्र तोकिएको छ, जहाँ ३९ हजार ५९९ महिला र ३६ हजार ५४२ पुरुष गरी कुल ७६ हजार १४१ मतदाता छन्।
निर्वाचन क्षेत्र नं. ५ मा ३१ मतदान स्थल र ९० मतदान केन्द्र रहेका छन्। यस क्षेत्रमा ४० हजार ८३२ महिला, ३७ हजार २७८ पुरुष र अन्य चार जना गरी कुल ७८ हजार ११४ मतदाता छन्। निर्वाचन क्षेत्र नं. ६ मा ३२ मतदान स्थल र ७९ मतदान केन्द्र छन्, जहाँ ३४ हजार ९५६ महिला, ३२ हजार ८०२ पुरुष र अन्य एक जना गरी ६७ हजार ७५९ मतदाता कायम छन्।
निर्वाचन क्षेत्र नं. ७ मा २९ मतदान स्थल र ७८ मतदान केन्द्र छन्। यहाँ ३४ हजार ७३८ महिला र ३२ हजार ६७३ पुरुष गरी कुल ६७ हजार ४११ मतदाता रहेका छन्। निर्वाचन क्षेत्र नं. ८ मा २३ मतदान स्थल र ६५ मतदान केन्द्र तोकिएको छ, जहाँ २९ हजार ८९८ महिला र २७ हजार ९१३ पुरुष गरी ५७ हजार ८११ मतदाता छन्।
त्यस्तै निर्वाचन क्षेत्र नं. ९ मा ३४ मतदान स्थल र ९० मतदान केन्द्र छन्। यस क्षेत्रमा ४० हजार २७८ महिला र ३८ हजार २१७ पुरुष गरी कुल ७८ हजार ४९५ मतदाता रहेका छन्। निर्वाचन क्षेत्र नं. १० मा ४७ मतदान स्थल र ९८ मतदान केन्द्र तोकिएको छ, जहाँ ४२ हजार ७१६ महिला, ४० हजार ५८३ पुरुष र अन्य दुई जना गरी कुल ८३ हजार ३०१ मतदाता कायम छन्।
जिल्ला निर्वाचन अधिकारी भट्टराईका अनुसार निर्वाचन क्षेत्र नं. १ मा ३०, क्षेत्र नं. २ मा २२, क्षेत्र नं. ३ मा २४, क्षेत्र नं. ४ मा २८, क्षेत्र नं. ५ मा २७, क्षेत्र नं. ६ मा २२, क्षेत्र नं. ७ मा २८, क्षेत्र नं. ८ मा २२, क्षेत्र नं. ९ मा २७ र क्षेत्र नं. १० मा २७ उम्मेद्वारले मनोनयन पत्र दर्ता गराएका छन्। यसरी काठमाडौँका १० वटै निर्वाचन क्षेत्रमा कुल २५७ उम्मेद्वारले मनोनयन दर्ता गराएको उहाँले जानकारी दिनुभयो।
