टाइफुन ‘बाभी’को कहर: चीन, ताइवान र जापानमा लाखौँ प्रभावित

चितवन, २७ आषाढ । शक्तिशाली टाइफुन ‘बाभी’का कारण चीन, ताइवान र जापानका विभिन्न क्षेत्रमा व्यापक प्रभाव परेको छ।

चीनमा नौ लाखभन्दा बढी मानिसलाई सुरक्षित स्थानमा सारिएको छ भने ताइवान र जापानमा हजारौँ घरपरिवार विद्युत् सेवाबाट वञ्चित भएका छन्।

चीनको झेजियाङ प्रान्तमा टाइफुन आइतबार बिहान जमिनमा ठोक्किने अनुमान गरिएको छ। सम्भावित क्षतिलाई मध्यनजर गर्दै स्थानीय प्रशासनले आठ लाख ८७ हजारभन्दा बढी मानिसलाई सुरक्षित स्थानमा स्थानान्तरण गरेको जनाएको छ। उत्तरी चीनमा अविरल वर्षापछि थप एक लाखभन्दा बढी नागरिक विस्थापित भएका छन्।

ताइवानमा १४ हजारभन्दा बढी मानिसलाई सुरक्षित स्थानमा सारिएको छ। सयौँ उडान रद्द भएका छन् भने एक लाख ७० हजारभन्दा बढी घरमा विद्युत् आपूर्ति अवरुद्ध भएको छ। जापानको ओकिनावा क्षेत्रमा पनि १८ हजारभन्दा बढी घरपरिवार विद्युतविहीन भएका छन् र दर्जनौँ उडान रद्द हुँदा हजारौँ यात्रु प्रभावित भएका छन्।

विज्ञहरूले समुद्री सतहको बढ्दो तापक्रम र जलवायु परिवर्तनका कारण यस्ता उष्णकटिबन्धीय आँधी अझ शक्तिशाली बन्दै गएको बताएका छन्।